إزاي أقدر أكتب خطة ديجيتال ماركتنج قوية وواقعية؟ هنحاول نتكلم عن خطة التسويق الإلكتروني وعناصرها والهدف من كل عنصر وبنكتب إيه في كل عنصر, بس قبل ما نبدأ حابب أقول لحضرتك نقطتين:
1- أنا بحب أبعد عن الكلام النظري في الخطة وبالتالي أي كلام مش هيتنبي عليه خطوات عملية أنا مش بحب أكتبه خالص.
2- طريقة كتابة الخطة أمر إجتهادي بيختلف من شخص لاخر, كل واحد ليه تركيبته اللي بيحب يتبعها أثناء كتابة الخطة واللي شايفها إنها الأنسب, وبالتالي حضرتك تقدر تعدل كما تشاء على عناصر الخطة وترتيبها وفقا للأفضل من وجهة نظرك.
إزاي أقدر أكتب خطة
خلونا نبدأ ونقول إن بدون تجهيز خطة تسويق يبقى إنت بتتحرك في الفراغ وغالبا مش هتوصل لحاجة قوية .بشكل عام الخطة هدفها توصلك من النقطة أ إلى النقطة ب,
النقطة أ هي الوضع الحالي لشركتك,
النقطة ب هي الوضع المأمول لشركتك,
وعلشان نوصل من أ إلى ب هنحتاج 3 حاجات
:
:1- نحدد إحنا فين أصلا دلوقت (نرفع الواقع ونحلل السوق)
2- نحدد إحنا عايزين نروح فين (نحط أهداف واقعية وطموحة)
3- نحدد الخطوات اللازمة لإنتقالنا من وضعنا الحالي لوضعنا المئمول
1- الملخص التنفيذي للخطه التسويقية :
ده اخر حاجة بتتكتب خالص وهي ملخص للخطة كلها بحيث العميل يطلع عليها علشان ياخد فكرة عن اللي مكتوب في الملف بالكامل قبل ما يبدأ يقرأه بالتفصيل.
2- مقدمة موجزة عن الشركة
هنا في صفحة واحدة بنكتب تعريف سريع بالشركة وبالمنتج أو الخدمة اللي الخطة دي معمولة لتسويقها, وهدف المقدمة دي إن لو الملف إتعرض على أي حد للإطلاع عليه وتقييمه, فيكون فاهم إحنا بنتكلم عن أي شركة وعن أي منتج.
3- نظرة عامة على السوق
هنا بنعمل تحليل للسوق بشكل عام, وده بناء على بحثنا عن السوق ومعرفتنا طبيعته ..هل ده سوق موسمي ولا طول العام؟..هل القطاع ده في إزدهار ولا بيحصله إنكماش؟…هل المجال ده مدعوم من الدولة ولا غير مرحب بيه وبالتالي بيلاقي تضيقات؟..إلخ
هدف النظرة العامة دي إن بحاول أخلي العميل يشوف وضع السوق ويحدد الخطوط العريضة اللي هيتحرك بيها على مستوى شركته واللي أنا هتحرك بيها على مستوى خطة التسويق,
فمثلا نفترض إن السوق فيه إنكماش وتراجع فساعتها أنا كشركة هقلل من نشاطي وهحاول أنوع من مصادر دخلي بحيث أتجنب ضعف الإيرادات المتوقع.
مثال تاني:
قطاع معين الدولة شايفه إن المنافسة من القطاع الخاص فيه هتكون مضرة , وبالتالي ساعتها أنا بوجه العميل إنه يحاول يعمل شراكة مع القطاع الحكومي , وأنا كمسئول عن التخطيط للتسويق بحط من ضمن أهدافي “تعميق الصورة الذهنية عند الفئة المخاطبة بأني شريك ومنسق ومعاون مع القطاع الحكومي في هذا النشاط” وطبعا الهدف ده هيتم ترجمته على هيئة خطوات فعليه على الأرض.
4- الجمهور المستهدف
هدفي هنا إني برسم شخصية عملائي المحتملين, فمثلا لو أنا ببيع ساعات رولكس أصلية…فهقول إن خصائص عملائي :
السن .. من 35 إلى 55 سنة
المستوى المادي : class a
الوظائف : رجال الأعمال والمستثمرين وأصحاب المناصب الإدراية المتوسطة والعليا في القطاعات الخاصة والعليا في القطاعات الحكومية
أماكن التواجد : المدن لا سيما القاهرة ثم إسكندرية ثم الدلتا
الإهتمامات : البيزنس والتجارة والشركات
……..إلخ
يعني بعمل عصف ذهني مدعوم بمعلومات علشان أقرب جدا من خصائص معظم عملائي , وخلي بالك من كلمة “معظم” , لأني وأنا بشوف جمهوري المستهدف مش هحط كل أنواع العملاء المحتملين, ولكن بحط العملاء اللي منطقي وطبيعي يشتروا مني مش اللي هما استثناءً هيشتروا مني,
مثلا في الحالة اللي قولنا عليها, وارد ألاقي شاب لسه متخرج حابب يشتري ساعة رولكس علشان فرحه مثلا, لكن هل ده الشائع والمعتاد ولا دي حالة استثنائية؟.. وفي التسويق دايما بحاول أركز على الأصل واتجنب الاستثناء على قدر المستطاع لأن الوصول ليه وإقناعه بيكون مكلف نسبيا.
5- تحليل المنافسين
بعمل تحليل في جدول لأبرز 3 منافسين, الجدول فيه 5 خانات, خانة لاسم المنافس, خانة لترتيب المنافس في السوق وبين قوسين بكتب الحصة السوقية لو متاحة, خانة لنقاط القوة, خامة لنقاط الضعف, خانة للملاحظات.
خلي بالك أنا لما بعمل تحليل للمنافسين بيكون هدفي أعرف نقاط قوتهم علشان أشوفها عندي وأحاول أقرب الفجوة بيني وبينهم , ونقاط الضعف علشان أحاول استثمرها بحيث تكون نقاط تميز ليا عليهم وكأنها فجوة سوقية أنا بسدها وبلعب عليها تسويقيا بقوة.
6- تحليل SWOT للشركة 
هنا بقى أنا بعمل جدول بكتب فيه نقاط القوة ونقاط الضعف والفرص والتحديات الخاصة بالشركة أو المنتج اللي أنا بسوقله, وبالتالي الخطوة دي هي تعتبر مكملة للي قبلها, كأني اكتشفت السوق والمنافسين ثم انتقلت ليها علشان استفيد من تحليلي للاخرين ولوضعي القائم علشان استثمر الفرص المتاحة أدامي بأفضل شكل من الناحية التسويقية.
ناخد مثال:
المتجر الإلكتروني أ المنافس ليا , لما عملته تحليل وفحص, إكتشفت إنه مش شغال SEO صح وبالتالي الدومين أثورتي بتاعه ضايع ومعدل الزيارات من محرك البحث قليل, دي علطول تتحول عندي لفرصة, الفرصة هنا إني أهتم بشغل الـ SEO بحيث استغل نقطة الضعف اللي عند المنافس وأحولها لنقطة قوة عندي.
7- الأهداف
أنا بحب أأخر شوية الاهداف للمرحلة دي لأني بشوف الكلام بالترتيب ده منطقي, أنا حللت السوق والمنافسين وشوفت نقاط القوة والضعف والفرص والمخاطر للشركة أو المنتج اللي بسوقلهم وبالتالي الرؤية كده بقيت واضحة وفهمت أنا فين دلوقت وأقدر أحدد بناء على فهمي ده أنا عايز أروح فين “الأهداف”..ناخد مثال على الأهداف:
زيادة المبيعات بنسبة 30%
تقليل معدل الإرتداد في الموقع بنسبة 50%
زيادة زيارات الموقع من 2000 زيارة يوميا إلى 2500 زيارة يوميا على الأقل
زيادة رضا العملاء بنسبة 40% (الرضا ده هقيسه إزاي؟..بطرق كتير منها مثلا متابعتك لعدد شكوى الواردة من العملاء ومنها عمل استبيان بسيط لعملائك)
8- الأنشطة المخطط تنفيذها 
أنا في الخطوة اللي فاتت حددت أهدافي, طيب علشان أحول الاهداف دي لواقع لازم أمشي على خطوات تنفيذية واضحة, اللي هي الأنشطة اللي هقوم بيها علشان أوصل للأهداف..
ناخد مثال:
أنا قررت بناء على تحليلي للسوق ولشركتي إني لازم أشتغل تسويق بالمحتوى, يبقى هبدأ أجهز خطة نشر مفصلة بالأيام والموضوعات والمسئولين عن الكتابة وتصميم صور الموضوعات والنشر.
9- مؤشرات قياس الأداء KPIs 
في الخطوة اللي فاتت إحنا حددنا الأنشطة الكفيلة بإيصالنا للأهداف, طيب هقيس إزاي إذا كانت الأنشطة دي أتنفذت صح ولا لأ ؟ وهل وصلتنا للاهداف ولا لأ؟, يبقى لازم يكون في عندي مؤشرات لقياس الأداء,
ناخد مثال:
واحد من أهدافي إني أزود الوعي بالعلامة التجارية للضعف, طيب ده أقيسه إزاي؟, إيه المؤشر اللي يقولي إني ماشي صح؟,
ممكن ساعتها أتابع معدلات وصول حملاتي الإعلانية للجمهور وأقارنها بمثيلتها في نفس الوقت من العام الماضي,
ممكن كمان أعمل استطلاعات رأي سريعة أقيس من خلالها تأثير خطتي التسويقية شهر بشهر على العملاء المحتملين ووعيهم بمنتجي,
ممكن أقيس كمان معدل تحميلات التطبيق بتاعي أو زيارات موقعي أو التفاعل مع المحتوى اللي بنشره, وهكذا.
خلي بالك أوعى تخلي متابعتك لمؤشرات الأداء في نهاية الخطة بس, لازم يكون عندك متابعة دورية بحيث تتأكد إنك ماشي صح, ولو حصل أي خطأ تلحق تعالجه.
10- الموارد المطلوبة (البشرية – المادية – التقنية) 
أنا خلاص حللت السوق وشركتي وشوف أنا فين وعايز اروح فين وكتب الأهداف والأنشطة بمؤشرات الاداء, طيب علشان أنفذ الخطة
دي أنا محتاج شوية موارد ..مثلا محتاج كاتب محتوى و مصمم و..إلخ , ومحتاج 10 الاف جنيه للإعلانات الممولة و 5 الاف جنيه لإطلاق مدونة تابعة للموقع و…إلخ, ومحتاج إشترك في تطبيق zoom و أداة hootsuite و Moz ونرفع سرعة النت إلى 20 جيجا علشان هنعمل محاضرات أونلاين تعريفية بشكل مستمر وهنرفع فيديوهات كتير أول بأول…إلخ,
وبعدها نلخص قيمة كل الموارد المطلوبة بحيث الشركة تسعى في توفيرها في حال إعتماد الخطة.
11- توصيات 
زي ما إتكلمنا قبل كده, التسويق هو مظلة بتغطي كل مراحل وأقسام الشركة, وبالتالي لازم حضرتك ترفع للإدارة توصياتك , مثلا:
تحسين خدمة العملاء (لأنها هتضيع مجهودك التسويقي),
تسريع التوصيل (لأن شركة التوصيل بناء على دراستك اكتشفت إنها بتودي الطلب للعملا بعد 3 أيام ودي مدة طويلة مقارنة بالمنافسين) ,
تغيير ألوان التغليف (لأن بناء على استطلاعات رأي قمت بيها أكتشفت إن الفئة المستهدفة مش حابة الألوان دي خالص وبتبصلها إنها حاجة قديمة ومش شيك وبالتالي مش بيتشروا المنتج)….إلخ
لو تلاحظ إن التوصيات دي بتكون في اقسام تانية لكن لو دورت بتمعن شوية هتلاقي إنها بتاثر بقوة على دورك التسويقي وعلى مدى نجاح خطتك.
12- المراجع 
حضرتك قاعد تذكر في أرقام وإحصائيات, وإن معدل نمو السوق كذا في الميه, وإن المنافس حصته السوقية كذا,…إلخ, طيب فين مصادر الكلام ده.؟, يبقى لازم تذكر مراجع ومصادر لمعلوماتك علشان تكون معلومات دقيقة وعلشان لو الإدارة حبيت ترجع للأصل وتتطلع على معلومات أكثر تفصيلا.
كده أنا خلصت اللي حابب أقوله النهارده, بس الكلام الجاي هو الأهم:1- أوعي تستصعب كتابة خطة تسويق, ولا إنك تتهرب من كتابتها وتقعد تتوه العميل بكلام عام, ده مش صح خالص, الأمر سهل إن شاء الله بس بيحتاج شوية جهد أثناء تجهيزها لاول مرة, بعد أول خطة تكتبتها هتلاقي الأمور بقيت أسهل, ومع كل خطة تكتبها الموضوع هيكون أكثر إحترافية وسهولة وهتلاقي نفسك بتتطور بسرعة إن شاء الله.
2- استخدم الإنفوجرافيك والرسوم التوضيحية في خطتك, بعيدا عن الناحية الجمالية فهي كمان بتسهل وصول المعلومة وبتلخص كلام كتير.
3- أوعى تحشي الخطة بكلام نظري مالوش لازمة , حاول دايما يكون كلامك مركز وموجز ومدعم بالأرقام والحقائق.
4- أهم حاجة التطبيق العملي, حاول تكتب خطة تسويق حتى ولو تختار منتج ما في السوق مالكش علاقة بيه من باب التدريب بس,. ولو حابب ممكن تبعتلي الخطة اللي عملتها على الخاص وهراجعها إن شاء الله وابعتلك الملاحظات .
بكدا تكون قدرت توصل لمفهوم إزاي أقدر أكتب خطة
