استراتيجيات عروض الأسعار في فيسبوك أو Bid Strategies
استراتيجيات عروض الأسعار في فيسبوك أو Bid Strategies
بس خلونا قبل ما نبدأ في أنواع استراتيجيات عروض الأسعار نعرف الأول يعني إيه مزاد أو Auction.
المنافسة في إعلانات فيسبوك بتعتمد على نظام المزاد اللي كلنا عارفينه، يعني اللي يدفع أكتر هو اللي يكسب المزاد.
وبالتالي انت لما بتنزّل إعلان على فيسبوك مثلا؛ انت معاك منافسين، والمنافسين دول بيتنافسوا على الأماكن اللي الإعلان بيظهر فيها عند الجمهور اللي انت مستهدفه انت ومنافسيك، والمنافس اللي يدفع فيهم أكتر في المزاد ده هو اللي بيفوز بالمزاد وإعلانه بيظهر.
مثال:
انت عندك حملة عقارات ومعاك منافس تاني ليك وانتو الاتنين مستهدفين شخص مواصفاته كذا وكذا، انت قايل للفيسبوك أنا عايز أدفع في المزاد ده 10 جنيه والمنافس بتاعك قال أنا هدفع 10 جنيه وقرش، كده المنافس بتاعك هو اللي كسب وانت خسرت المزاد.
علشان تعرف أكتر عن موضوع المزاد والعوامل اللي بتأثر عليه ، شوف البوست ده:
——————————-
نيجي بقى لأنواع استراتيجيات عروض الأسعار:
1. التكلفة الأقل أو Lowest Cost:
ده الافتراضي في كل أنواع الحملات، هنا بتريح دماغك وبتقول للسيستم يجيبلك أكبر عدد ممكن من التفاعلات engagements أو التحويلات conversions أو الرسائل أو Form Leads … إلخ في حدود الميزانية بتاعتك وبأقل سعر ممكن للتفاعل أو التحويل الواحد بشكل أوتوماتيك بدون حد أدنى أو أقصى.
يعني ممكن تلاقي سعر تفاعل أو تحويل 10 جنيه وسعر تفاعل تاني 3 جنيه وتفاعل تالت 20 جنيه وهكذا، حسب ظروف كل مزاد انت بتدخله وحسب عرض السعر اللي كل منافس ليك بيحدده.
وده بيفسر إن ممكن أكون عامل حملة رسايل مثلا وألاقي متوسط سعر الرسالة النهاردة 5 جنيه وبكرة فجأة بقى 11 وبعده بقى 2 وهكذا.
النوع ده متاح في كل أنواع الحملات.
——————————-
2. التكلفة المستهدفة أو Target Cost:
هنا انت بتحدد سعر (متوسط) لتكلفة التفاعل أو التحويل اللي عايز تتحاسب عليها في حدود 10% من السعر اللي بتحدده بنفسك.
مثال:
لو حددت 10 جنيه متوسط لتكلفة التفاعل أو التحويل وكان متوسط تكلفة التفاعل أو التحويل الطبيعي بتاع إعلانك 8 جنيه مثلا، هيدخلك في مزاد يكون تكلفة التفاعل أو التحويل بتاعته قريبة برده من 10 جنيه حتى لو كان إعلانك يقدر يدخل مزادات ب 8 جنيه أو أقل، وهيفضل يدخلك في المزادات اللي سعرها من 9 لـ 11 جنيه علطول لا أقل ولا أكتر.
وده أنا مش برجحه لأنه ممكن يكلفك فلوس زيادة عالفاضي.
متاح في حملات: App Installs, Lead generation, Conversions, Catalog sales
——————————-
3. الحد الأقصى للتكلفة أو Cost Cap:
بتحددله حد أقصى لسعر التفاعل أو التحويل الواحد ميزيدش عنه بشكل إجمالي، ولكن الحد الأقصى ده مش مطلق بمعنى إن السعر ده بيبقى متوسط average في كل مزاد إعلانك بيدخله، ممكن مرة يكون أقل من السعر اللي انت حددته ومرة تانية يكون أعلى، ولكن بشرط إن إجمالي عدد التفاعلات أو التحويلات اللي هتجيلك هيبقى المتوسط بتاعها كلها في حدود الحد الأقصى اللي انت حددته، وبيبدأ بالمزادات الأقل سعر ممكن.
مثال: انت حطيت 10 جنيه حد أقصى للتكلفة، فإعلانك هيجيب تفاعل أو تحويل مرة ب 5 جنيه ومرة تانية هيجيب تفاعل أو تحويل ب 15 جنيه فالمتوسط الإجمالي هيكون 10 جنيه لإجمالي التفاعلات أو التحويلات اللي هو المبلغ اللي انت حددته.
النوع ده بياخد وقت في مرحلة الـ learning لحد ما يستقر على سعر متوسط يستمر عليه.
متاح في حملات: Engagements, Traffic, App Installs, Video views, Lead generation, Conversions, Catalog sales
——————————-
4. الحد الأقصى لعرض الأسعار أو Bid Cap:
بتحددله حد أقصى لسعر التفاعل أو التحويل الواحد في كل مزاد إعلانك بيدخله بشكل مطلق، بحيث كل مرة سعر التفاعل أو التحويل ميوصلش أبدا للحد الأقصى اللي انت حددته، وبيبدأ برده بالمزادات اللي ممكن تجيب أقل سعر ممكن لحد ما يوصل للمزادات اللي سعرها أقل من الحد الأقصى اللي حددته.
مثال: انت حددت 10 جنيه حد أقصى لعرض الأسعار، فهتلاقي إعلانك هيجيب تفاعل مرة ب 4 جنيه ومرة ب 7 ومرة ب 9 بس عمره ما هيوصل لـ 10 ولا يزيد عنها، ولو في مزاد سعره 10 جنيه وقرش مش هيدخله أصلا.
عيوبه: لو حطيت سعر قليل أقل من اللي مفروض تدفعه للتفاعل أو التحويل الواحد إعلانك هيشتغل ضعيف أو ممكن ميشتغلش خالص.
متاح في حملات: Engagements, Reach, Traffic, App Installs, Video views, Lead generation, Messages, Conversions, Catalog sales, Store traffic
لو مش عارف تختار إيه أو خايف الدنيا تبوظ منك خليك على “أقل تكلفة” أو “Lowest Cost”، ولو حابب تختار نوع من الأنواع التانية ابدأ بده الأول فترة لحد ما تتعرف على متوسط السعر اللي مفروض تستخدمه.
الرائع م. محمدوجيه
