KPIs فهم مؤشرات الآداءافهم براندافهم مهارات البيعخد الزتونه
مش كل اللي بيضحك… مرتاح!
مش كل اللي بيضحك… مرتاح!
كل ما بدخل شركة، بيجي في بالي سؤال:
يا ترى، لو كل موظف شاف الصورة كاملة… كان هيحكم بنفس الطريقة؟
المدير مش دايمًا موجود…
لكن دايمًا شايل الهم فوق كتافه.
ناس كتير شايفة صاحب الشغل من بره: قاعد في مكتبه، ماسك الموبايل، بيشرب قهوته، وبيوزّع تعليمات.
بس محدش شايف المعركة اللي جواه!
ورق على المكتب من كل اتجاه…
أزمات مع موردين، شكاوى من عملاء، تأخير إنتاج، ضغط مبيعات، فريق محتاج متابعة،
وكل الناس مستنية قرار، ومفيش رفاهية التأجيل.
ضحكته أحيانًا مجاملة، وسكوته… وجع.
ولما يمشي وسط الناس يقول: “شُد حيلك، الله ينور”
هو بيحاول يطمنهم…
وهو نفسه مش مطمن!
جواه صراعات نفسية مش بيحكي عنها،
لأن لو صاحب الشركة وقع…
الكل هيتأثر.
وراها معركة مش باينة.
المصروفات بتلتهم الأرباح،
والأرقام الكبيرة مش دايمًا معناها مكسب.
صاحب شركة قاللي:
“أنا كل آخر شهر بطني بتوجعني…
وبدعي ربنا يسهل علشان أقدر أقبض الناس.”
البيزنس مش قهوة وشاي وسوشيال ميديا…
البيزنس حرب نفسية، كل يوم.
واللي لسه واقف، رغم كل ده… بطل حقيقي.
احنا أوقات بنشوف من برّه نجاحات،
لكن قليل اللي يعرف كام مرة كان هيقفل… ومكملش.
مش كل حد بقى “بيل جيتس”،
بس كل حد كمل… عنده حكاية تستحق التقدير.
