أهلا بيكم🌻..
هنتكلم النهارده عن ” استخدام الألوان 🎨 في التسويق”
👈 في ورقة بحثية بعنوان : Emotionally Toned Pictures and Color Selection for Children and College Students , الباحث أجري مجموعة تجارب على عدة ألوان علشان يحدد هل الألوان دي ليها ارتباط بعاطفة معينة في العقل الباطن للإنسان ولا لأ؟
◀️ مثلا من ضمن التجارب إن بعض الطلاب من عينة البحث بعد سماعهم لقصة حزينة قاموا باختيار ألوان تتناسب مع إحساسهم, وتجربة تانية إن بعض طلاب الجامعة اتعرض عليهم صور تدل على مشاعر مختلفة و هم اختاروا اللون الانسب لكل صورة, وهكذا…
✔️ وكانت خلاصة نتايج التجارب دي إن فعلا فيه ارتباط بين الألوان وبين العواطف , فمثلا:
ألوان زي الأصفر والبرتقالي والأزرق, ليها علاقة بمشاعر الفرحة والسرور والبهجة,
وألوان زي الأسود والبني و الأحمر ليها علاقة بمشاعر الحزن والاضطراب والخوف والغموض.
💡 وفقا لورقة بحثية بعنوان Colors in Marketing: A Study of Color Associations and Context (in) Dependence , فاختيارك السىء للون ممكن يقطع التواصل بين منتجك وبين العميل ويقلل كتير من قناعته بقيمة منتجك أو خدمتك.
👈 طيب تعالوا نشوف كده آراء شركات التسويق العالمية بالنسبة للألوان واستخدماتها (ده وفقا لبحث بعنوان Impact of color on marketing) :
🔴 اللون الأحمر : لون فاتح للشهية وبيدل على نوع من الحماس والسرعة, وبالتالي بيفضل استخدامه في قوائم طعام الوجبات السريعة, لكن اللون ليه تاثير على احساسنا بمرور الوقت, فمثلا اللون الأحمر بيزود الإحساس بالوقت, فلو حضرتك فاتح مركز طبي أو مركز تخسيس أو مركز محاماة أو اي نشاط تاني فيه حجرة انتظار, فبلاش تستخدم اللون الأحمر والبرتقالي في الإضاءة لأن ده هيزود إحساس العملاء بالوقت وهيحسسهم إنهم منتظرين لفترة أطول.
💛 اللون الأصفر: لون مبهج وبرضه له تاثير فاتح للشهية وبالتالي هو كمان بيستخدم في مطاعم الوجبات السريعة
🔵 اللون الأزرق: لون مهدىء للأعصاب لا سيما الدرجات الفاتحة منه وبالتالي بيستخدم في المطاعم الكلاسيكية اللي العميل بيقضي فيها وقت طويل نسبيا, لكن استخدام اللون الازرق يكون بدون إفراض لكن الاحساس المفرط بالراحة ممكن يكون ليه تأثير مثبط على الشهية وبالتالي العميل يطلب أكل اقل وحضرتك تكسب أقل, إلا لو مطعمك شغال بنظام “الأكل حتى الإشباع” فساعتها غرق الدنيا أرزق براحتك بقى , وبرضه زي ما اتكلمنا إن اللون الأحمر بيزود الإحساس بالوقت, فالعكس في حالة اللون الازرق, فلو حضرتك عندك غرفة انتظار حاول تخلي اللون الأزرق الفاتح غالب عليها ولو بتستخدم إضاءة ملونة يبقى خليك قريب من الأزرق الفاتح مش من الأحمر, وبرضه اللون الأزرق هتلاقيه دايما مرتبط بالصحة والنظافة الشخصية والجوانب الطبية.
⬛ اللون الأسود: ده حكاية لواحده, عايز اقولك إن فيه عشرات الأبحاث بتتكلم عنه لوحده (هو واللون الأزرق) , تعالوا نلخص التاثيرات النفسية المذكورة في الأبحاث دي : الحزن, القوة, الفخامة, الجودة العالية, الخوف, الغضب, الغموض …دول أبرز الاثار النفسية للون الأسود وطبعا بيختلف التأثير وفقا للسياق.
💡 بعض الباحثين بيقولوا إن تفاعلنا من الألوان مش واحد, بل بيختلف وفقا للنوع والسن والخلفية الاجتماعية وغيرها من العوامل, صحيح فيه ألوان بيكون ليها دلالات شبه ثابته زي الأحمر والأصفر والأسود والأبيض, لكن فيه الألوان تانية كتير بتبقى أشبه بالترندات , ممكن في فترة من الفترات يكون ليها تأثير معين والتأثير ده يختلف في وقت تاني لو تم ربطه بأحداث أو اشخاص معينة..
🌱 بشكل عام موضوع الألوان من المساحات اللي دايما في نقاش وأبحاث مختلفة بين العلماء,وفيه مساحات إشتراك ومساحات إختلاف.
لكن سؤال…هل إدراك الألوان عند الرجل نفسه عند الست؟
أكيد لأ..مثلا ألوان زي الرمادي والأبيض والأسود هي أكثر تفضيلا عند الرجال مقارنة بالنساء, وألوان زي الأحمر والأزرق تأثيرها أقوى عند الستات.
فيه نقطة تانية مهمة جدا برضه:
⬅️ تناسب الألوان…. وحضرتك بتختار ألوان البراند الخاص بيك, لازم تبص على الألوان المتجانسة مع بعض, فيه معايير عالمية للألوان, مثلا لو دخلت على موقع زي coolors.co هتلاقي مجموعات الألوان المتجانسة فحاول ما تخرجش عنها, ولازم تحتفظ بدرجات الألوان المعبرة عن البراند بتاعك بحيث تطلب من المصمم عندك إنك ما يطلعش بره كتير عنها, بحيث يكون ليك هوية بصرية ثابتة سواء في الألوان أو حتى الخطوط.
⬅️ و خلي بالك إن اللون ما ينفعش تنتزعه من سياقه, مثلا: خلونا نفترض إن اللون الذهبي والفضي بيدلوا على الفخامة والاناقة , حضرتك روحت بتنتج إكسسوارات حريمي , فقررت إن تستخدم اللونين دول في التغليف والعلب , ماشي تمام, بس لازم يكون تصميم العلب و الملصق اللي عليها احترافي, لازم الكتابة تكون بخط متناسب مع الإنطباع اللي عايز توصله للعميل فمثلا ما تستخدمش خط كرتوني, لازم الكلام نفسه المكتوب على العلبة أو الكيس أو التغليف مهما كان شكله يكون بيوصل الإحساس بالفخامة ده, يعني منتجك ده عامل زي لوحة فنية, صحيح الألوان في اللوحات الفنية مهم , لكن مستحيل اللون لوحده يطلع لوحه فنية جذابه وملفته, اللون عامل مساعد ضمن مجموعة عوامل تانية لازم تتكامل مع بعض علشان توصل الإحساس والأثر النفسي المطلوب.
🌿 أخيرا…أوعى تنساني من دعوة حلوة بظهر الغيب…
نتقابل بكره إن شاء الله….سلام💚
