طمني على الشركة

ندخل في الموضوع علطول وبدون مقدمات من كان يوم كدة قرأت موضوع من زميل عزيز بيقول ان الترند المشهور بتاع 95% من الشركات الناشئة بتفشل و 5% بس هى اللى بتكمل – دي كدة – وان السبب في كدة هو عدم معرفتنا بعدد الشركات الناشئة في مصر

انا عايز اعترض بس بالطريقة العلمية العملية، اللى نقدر نقول فيها يعني إية شركة فاشلة ويعني إية شركة ناجحة!

الفشل او النجاح في عالم الشركات وقطاع الأعمال بصفة عامة بيعتمد على لغة الارقام (الماليات والمحاسبة)

ربح

خسارة

عوائد

اصول

خصوم

دائن

مدين

سيولة

كاش

نقدية

شيكات

تحصيلات

مبيعات

دخل

خصم

صافي

كل اللى فوق ده بيتم ترجمته في صورة ارقام وليس اى شىء اخر!

يبقى الترجمة الحقيقية للفشل في شركتك بتعتمد على التالي

1- التعثر المالي – بمعنى وجود حالة من الخلل والاضطرابات التى تجعل الشركة غير قادرة على سداد التزامتها وبالتالي تحقيق خسائر متتالية والنتيجة بتكون في النهاية ايقاف النشاط

وعلى الناحية الاخرى وفي ظروف مماثلة لـــ(كورونا) او (حرب اوكرانيا) ممكن نعرف التعثر المالي على انه مواجهة الشركة لظروف طارئة وغير متوقعة بيترتب عليها عدم قدرتها على توليد عوائد او فائض يكفي لسداد التزاماتها المالية في الاجل القصير

2- الفشل المالي – دي ببساطة مرحلة ما قبل الافلاس علطول، وهنا تعريف D&B هو الأفضل على الاطلاق حين قامو بتعريف الفشل المالي على انه اى اعمال يتبعها تنازل الشركة عن اصول، او ممتلكات، او توقف مبيعات، وتحصيل اموال الشركة، وبمجرد الدخول في اى مشكلات قضائية وصدور احكام على الشركة

خلي بالك بقى ان تقريباً 19% من شركات مصر الناشئة والصغيرة ومتوسطة الحجم في تلك الدائرة – الفشل المالي – ومع ذلك بتحاول واصحابها بيتسلفو فلوس من هنا عشان يسدو ديون هنا، او بياخدو قروض من هنا عشان يسددوا ديون من هنا

3- الفشل الاقتصادي – بمعنى عدم استطاعة الشركة تحقيق عائد مقبول او معقول او عادل على الاستثمارات والعمليات والتشغيل اللى بتقوم بيه! او عندما يكون صافي رأس المال سالب والقيم الدفترية للخصوم والمطلوبات اكثر من قيمة الاصول

خلى بالك بقى ان تقريباً 76% من الشركات المصرية والعربية في تلك الدائرة المغلقة، وهى شركات مولودة وقائمة ومستمرة ولكن اللى بيدخل خزنتها اكثر من اللى بيخرج وعايشين على حد الجفاف والكفاف – حتى انهم على اعتاب نقطة التساوى – Breakeven Point – العوائد هى هى متساوية مع المصروفات او اقل حاجة بسيطة جداً

كل المشاكل المالية اللى ممكن تتسبب في فشل اى شركة بتنحصر في 5 اسباب اساسية (حسب ترتيب الأهمية):-

1- اسباب تسويقية

2- اسباب مالية

3- اسباب ادارية

4- اسباب فنية وتشغيلية وانتاجية

5- اسباب خارجية

طيب حصلت مشاكل مالية، والشركة بتخسر، والديون بيتزيد، والمصروفات والتكاليف خارج اطار السيطرة! مــا هـــو الحـــــل؟

1- إعادة الهيكلة – وهنا لازم تغيير كل الوضع الحالي وده معناة هيكلة مالية وإدارية وتقييم للأصول وهيكلة للديون وفي بعض الاحيان يتم مبادلة المديونية بالملكية او زيادة رأس المال من الشركاء المؤسسين وزيادة التدفقات النقدية الداخلة

2- الاندماج او الاستحواذ – يعني دخولك مع شريك اخر وتحالف واندماج بين شركتك وشركة اخرى، او استحواذ ومعناة انك تسلم نفسك لشركة أفضل تستحوذ عليك (أفضل الحلول) من وجهة نظري

3- الطرح للإستغلال والتأجير – وده من الحلول التي بدأت في الظهور خلال الخمس سنوات الاخيرة، انك تطرح شركتك بموظفيها وسلاطتها للتأجير مقابل مبلغ شهر او ربع سنوي او نصف سنوى او سنوي، او طرح اعمالك ومنتجاتك وخدماتك للإستغلال من شركات تانية – انا بشتغل في الطباعة وانت بتشتغل في الطباعة – حتعرض انت عليا انى استغل الالات اللى عندك وموظفينك واسمك التجاري عشان يكونو منافس امام الناس وهى في الحقيقة شراكة من تحت لتحت واستغلال

4- تغيير الشكل القانوني والتجاري والتشغيلي – وهنا انت لازم تبقى عاقل وواقعي وبلاش منظرة كدابة، يعني لو انت شركة بتشتغل في التصميم والطباعة، ممكن في لحظة من اللحظات تقرر تغيير طريقة العمل والمنتج والخدمة وتتخصص فقط في طباعة احتياجات الشركات – يعني تتحول من B2C الى B2B

وفي لحظة اخرى ممكن تغير الشكل القانوني والتجاري بالكامل وتقفل الشركة في مصر وتفتح في امريكا مثلاً وتبدأ تركيز على عملاء اجانبة

وفي لحظة تغير الشكل القانوني من شركة مساهمة الى شركة توصية بسيطة او شركة فرد واحد

كل التغييرات ممكنة في تلك اللحظة، المهم تدرس طبيعة الحالة اللى انت فيها وتقرر القرارات الصائبة اللى تكون في صالح البيزنس

5- التصفية والاغلاق – في اخر لحظات في حياة شركتك، دور على حد يشتريها، ولو مافيش، يبقى ارضى بالواقع والحقيقة وعليك البدء في التصفية والاغلاق واشهار الافلاس إن امكن بعد سداد ما عليك (ضرائب – ديون – حقوق) وغيره

لو عايز بقى تعرف انت في مرحلة فشل ولا نجاح – ركز معايا في النماذج والمؤشرات التالية

/// نموذج بيفر Beaver

النموذج بيقيس مجموعة من المؤشرات المالية وتحليلها لمدة سنة وحتى 5 سنوات و هنا أهم خمس مؤشرات عليك تحليلها

1- التدفق النقدي / مجموع الديون..

2- صافي الدخل / مجموع الاصول..

3- مجموع الأموال المقترضة / مجموع الأصول

4- صافي رأس المال العامل / مجموع الأصول

5- ألاصول المتداولة / الخصوم المتداولة..

كل ما النسبة والنتيجة كانت سلبية كل ما كان هذا مؤشر للتنبؤ بالفشل – يعني الحق نفسك

/// نموذج فيلمر Fulmer

النموذج بيستخدم 40 نسبة مالية وبيستخدم تحليل تفصيلي متعدد المتغيرات عشان يحدد هل في فشل ولا لاء، واهم النسب هى

V1 :الأرباح المحتجزة / مجموع الألصول.

V2 :المبيعات / مجموع الاصول.

V3 :الأرباح قبل الضرائب / حقوق المساهمين.

V4 :التدفق النقدي / مجموع الديون.

V5 :مجموع الديون / مجموع الأصول.

V6 :الخصوم المتداولة / مجموع الأصول.

V7 :الأصول الملموسة / مجموع الأصول.

V8 :رأس المال العامل / إجمالي الأصول.

V9 :لوغاريتم الربح قبل الفوائد و الضرائب / الفائدة.

انا شايف دلوقتي كذا واحد بيشوف الكلام الاخير ده وزعلان، وبيقول في سره ، ده كلام صعب قوى يا عم الحاج

عشان كدة حشارك معاكم مجموعة من المؤشرات والمقاييس المالية الاكثر سهولة وبساطة واللى تخليك تعرف انت بتكسب ولا بتخسر ، فاشل ولا ناجح

1-نسب السيولة – Liquidity Ratios

2- نسب الرافعة (ادارة أو تحليل المديونية) – Financial Leverage Ratios

3- نسب الربحية – Profitability Ratios

4- نسب النشاط (ادارة الموجودات) Activity or Assets Management Ratios

دعني في البداية اوضح لك ان هناك ما نُطلق عليه تقييم الأداء Performance Evaluation

وهناك ما نسمية تقويم الأداء Correction Procedures

// نسبة السيولة – وهى قدرة الشركة على تسديد الالتزامات المالية القصيرة الأجل بمعنى هل هناك احتمال خطر تمويلي؟ Financial Risk

لذلك قدرتك المالية في المدى القصير هى مؤشر هام على نجاح الشركة

// نسبة الرافعة المالية – وهى قدرة الشركة على سداد كافة الديون حين يحين موعد استحقاقها – قصيرة الاجل او طويلة الاجل

// نسبة الربحية – وهى قدرة الشركة على توليد الارباح من خلال المبيعات والموجودات وحقوق الملكية ولها عدة مؤشرات دقيقة هى الاهم:

أ. نسبة هامش الربح (مجمل الربح) وهذا المؤشر هو الوحيد الدال على كفائتك في إدارة التسعير وتوليد المبيعات والسيطرة على التكاليف

ب. نسبة هامش الربح التشغيلي – وهذا المؤشر هو دلالة كافية على الكفاءة التشغيلية للشركة واقسامها وعملياتها

ج. نسبة صافي الدخل – بمعنى قياس قدرة المبيعات على توليد صافي دخل

د. معدل العائد على الاستثمار (الموجودات) – بإختصار هو تحقيق الارباح بالاستثمار في كل خدماتك ومنتجاتك واعمالك وعلاقاتك

// نسبة النشاط – هى مجموعة من المقاييس لتحديد كفاءة إدارة موارد المنشأة من خلال مقارنة المبيعات الصافية مع الاستثمار في الاصول