هنتكلم النهارده عن أداة في غاية الأهمية..وهي:Google search console
حوالي نص زيارات موقعك بتيجي من خلال محرك البحث جوجل
,وده أكتر بكتير من الزيارات اللي بتجيلك من منصات السوشيال ميديا مجتمعة, وده معناه إن حضرتك لازم تهتم بتصدر محرك البحث جوجل وتظبط السيو SEO بتاع موقعك
وأهم أداة بتساعدك في تظبيط السيو (من وجهة نظري) هي Google search console
ودي الأداة المجانية اللي بيوفرهالك جوجل علشان تقدر تتابع الروابط في موقعك والكلمات المفتاحية اللي بيجي عليها زيارات وبالتالي تقدر تظبط موقعك وتعالج الروابط البايظة وتحسن محتواك وتضيف خريطة سهل الفهم لموقعك بحيث يكون سهل على عناكب بحث جوجل قرائته وأرشفته واقتراحه على متصفحي محرك البحث جوجل.
إزاي استخدم جوجل سيرش كونسول لزيادة زوار موقعي؟بعد ما تعمل حساب على جوجل سيرش كونسول وتربطه بموقعك وتتأكد من خلال “ملفات sitemap” إن موقعك ليه خريطة سهلة الأرشفة من عناكب محرك البحث , هتعمل التالي:
1- من “الأداء” نزل ملف الإكسيل الخاص بالكلمات المفتاحية (الشيت ده هيكون فيه 5 بيانات مهمة …أهم طلبات البحث + النقرات + عدد مرات الظهور + نسبة النقر + الموضع)
2- إفحص الكلمات دي كويس وإبدأ إفصل الكلمات المهمة بالنسبة لمجالك واللي يتوافر فيها 3 شروط : عدد مرات الظهور كتير و نسبة النقر عالية و الموضع الحالي متوسط أو متقدم..ده معناه إن الكلمة دي عليها بحث عالي ونسبة الكليك عليها برضه كويسة وإن عندك فرصة تتصدر فيها لو ركزت عليها في المحتوى اللي بتكتبه في موقعك.
3- بعد ما فصلت أهم كلمات مفتاحية (وياريت يكونوا Long tail مش short tail يعني بيتكونوا من 3 أو 4 كلمات مش كلمة واحدة علشان المنافسة تكون أسهل والنتايج أسرع) إبدأ إعمل جدول نشر محتوى هدفه تقوية موقعك في الكلمات المفتاحية دي وياريت تدعم كمان كل كلمة من دول بباك لينك قوي .
4- تابع أول بأول معدل الزيارات اللي جايالك من الكلمات دي و الموضع بتاعها, يعني لاحظ هل موقعك بيتقدم في نتايج البحث الخاصة بالكلمات دي ولا لأ.
سؤال..هل ممكن أعمل كل ده وبرضه ما أتصدرش في نتايج جوجل؟وارد ده يحصل لعدة أسباب اهمها:
1- المنافسة شديدة على الكلمة دي وبالتالي محتاج شوية وقت واستمرار في النشر
2- الدومين أثورتي بتاعت موقعك قليلة وبالتالي محتاج ترفعها من خلال الباك لينك
3- مش مظبط الmetadata ( اللي هيا أهمها عنوان ووصف الصفحة)
4- المحتوى تعبان , ومش جذاب بالقدر الكافي للقارىء (يعني بيدخلوا على الصفحة وبعدها يقرئوا سطرين ويطلعوا تاني وده مخلي معدل الارتداد عالي فجوجل فهم إن محتواك غير مفضل للقارىء) وبالتالي محتاج تجوده.
5- موقعك بطيييء أو مش mobile friendly ودي عوامل سلبية جدا عند جوجل.
هل فيه حاجات تانية جوجل سيرش كونسول بيفيدني فيها؟أيوه طبعا, جوجل سيرش كونسول بيقولك من خلال “تجربة المستخدم” بيانات مهمة جدا زي : هل موقعك فيه صفحة تالفة ولا لأ؟ هل سرعة موقعك مناسبة ولا هو بطيىء؟ هل موقعك mobile friendly ولا لأ؟…و من خلال “الأمان والإجراءات اليدوية” هتعرف : هل موقعك متركب عليه شهادة الحماية HTTPS ولا لأ؟ …وكل دي عوامل بتأثر في تصدر موقعك لمحركات البحث.
سؤال..إزاي أعرف الصفحات اللي فيها مشاكل؟من “تجربة المستخدم” , هنروح على “مؤشرات أداء الويب الرئيسية” واضغط على “فتح التقرير” فيظهرلك قايمة كاملة فيها الصفحات البطيئة واللي محتاجة تحسين والجيدة, وتقدر تضغط على كل صفحة منهم علشان تعرف المشكلة فين بحيث تكلم المبرمج يصلحها, وبعدها إدخل شيك تاني على الروابط دي وإتأكد إن المشكلة إتحلت والصفحة بقيت تمام وده من خلال زرار اسمه “التحقق من الإصلاح” بس خلي بالك إن ممكن جوجل ياخد 28 يوم لغاية لما الإصلاح دي يسمع عندك في الحساب.
ملاحظة: لتسريع زحف جوجل لصفحة ما, تقدر تعمل “فحص لعنوان url” وساعتها كأنك بتجبر عناكب بحث جوجل تروح للصفحة دي بعد التحديث اللي إنت عملته عليها.
سؤال..إزاي أقدر أشوف وضع كلمة مفتاحية معينة أنا مستهدفها في موقعي؟مثلا حضرتك بتستهدف كلمة زي “ملابس أطفال شتوي”, وإنت مش عارف إيه وضع موقعك من الكلمة دي لما حد بيبحث عنها وهل الجهد اللي إنت قومت بيه في المقالات جايب تحسن ولا لأ؟, فساعتها حضرتك هتروح على “الأداء” ومنه “جديد” ثم ” طلبات البحث” وتكتب الكلمة المفتاحية اللي إنت عايز تفحصها, ومش كده وبس ده إنت كمان ممكن تحدد الدولة, فمثلا تختار “السعودية” بحيث تشوف وضع الكلمة المفتاحية دي لما حد من السعودية بيبحث عنها وإنت بتظهر رقم كام وبيجيلك كام كليك عليها.
هل ممكن أختبر نتيجة التعديلات في صفحة ما في موقعي؟
أيوه, من الحاجات الجميلة في جوجل سيرش كونسول, إنك مثلا كاتب مقال من 1000 كلمة وبعدها عايز تشوف مدى التحسن في نتيجة الظهور في محركات البحث لو إنت زودت المقال ل 4000 كلمة (أو لو عملت أي تعديل اخر), فساعتها تقدر تعمل التعديل اللي إنت عايزه وتصبر إسبوع أو عشر أيام وتشوف مدى التحسن في النتيجة من حيث عدد مرات الظهور ومعدل النقر والموضع في صفحة البحث, (تقدر تعمل الكلام ده من خلال “الأداء” ثم “جديد” ومنها “الصفحة” وضيف لنك الصفحة اللي عايز تعملها فحص).
سؤال أخير..هل Google search console أفضل لتتبع وتحديد الكلمات المفتاحية ولا الأدوات المدفوعة زي Ahrefs ؟جوجل سيرش كونسول أفضل , ولو قارنت بين عدد الكلمات المفتاحية اللي بكتشفها Ahrefs وبين الكلمات المفتاحية في حالة جوجل سيرش كونسول فهتلاقيها من 30 إلى 40% فقط , وده منطقى لأن أي أداة – مش معمولة من جوجل – مستحيل تعمل تغطية شاملة لكل صفحات المواقع .
أخر واهم وصية: أوعى تنسي إن “المحتوى هو الملك”, إكتب محتوى قيم ومفيد للزوار, سيبك من اللت والعجن وحشو الكلمات المفتاحية في كل حته في المقال, إكتب محتوى محترم وممتع للقارىء. ودي بعض الفيديوهات والمقالات اللي هتعرفك أكتر عن استخدام الأداة الرائعة دي:…………………………….
د. محمد ابوالعمايم.
