إيه أفضل وقت أنشر فيه بوست على الصفحة علشان يوصل لعدد كبير من المشتركين بالصفحة؟
مبدئيا كده مفيش وقت ثابت بشكل عام ..
ولكن من خلال مراجعة إحصائيات صفحتك هتقدر توصل لأفضل وقت كان مشتركي صفحتك موجودين أونلاين فيه خلال آخر أسبوع.
هتدخل على Insights أو الرؤى وبعدين تختار Posts
هتلاقي رسم بياني بيوضحلك الأوقات اللي مشتركي صفحتك كانوا موجودين فيه أونلاين خلال آخر أسبوع.
هتشوف أفضل وقت ده كان من الساعة كام للساعة كام بس خلي بالك التوقيت ده حسب التوقيت الأمريكي Pacific Time Zone وده بيبقى قبل توقيت مصر بـ 9 ساعات
هتروح للموقع ده
وتعمل تحويل من التوقيت اللي ظاهرلك في الرسم البياني للتوقيت بتاعك (القاهرة مثلا).
بعد كده تحاول تنشر في التوقيت ده علشان تضمن إن أكبر عدد ممكن هيوصلهم البوست بتاعك بدل ما تنشر في توقيت كل الناس نايمة فيه وترجع تشتكي إن البوستات بتاعتك الـ Reach بتاعها ضعيف وتقعد تدعي على مارك اللي مستقصدك انت بالذات 
طبعا كل كام يوم هترجع للرسم البياني ده تاني علشان التوقيت ده ممكن يتغير يعني الناس في رمضان أكيد مش بتبقى أونلاين زي بعد رمضان وهكذا.
وبرده ممكن تقف على يوم معين في الرسم البياني وتعرف أفضل وقت في اليوم ده تحديدا إيه لأن مش كل الأيام بتبقى زي بعضها ، فلو هتنشر بوست يوم الأحد شوف يوم الأحد اللي فات كان أفضل وقت إيه وانشر فيه.
ودي شوية نصائح إضافية هتحسن من الـ Reach بتاع صفحتك:
1. ممنوع استخدام خدمات زيادة اللايكات الوهمية.
2. يفضل عدم استخدام جدولة نشر البوستات، انشر البوست بشكل يدوي فورا بدون جدولة.
3. انشر بوستات متعلقة بنشاط صفحتك بس.
4. انشر بشكل دوري كل يوم أو يومين بوست على الأقل.
5. انشر محتوى مفيد وهادف وحصري مش محتوى منقول أو غير مفيد.
6. حاول تخلي في البوست حاجة تحفز الفانز بتوعك إنهم يتفاعلوا مع البوست، زي سؤال مثلا يحفزهم إنهم يعملوا كومنت. مثلا: “قولولنا رأيكم في الكومنتات” أو “تحب البوست الجاي يكون عن ايه” وهكذا.
7. على عكس الاعتقاد الشائع فاللينكات في البوستات مفيش دليل على إنها بتقلل الـ Reach ولكن طبعا مع الاعتدال يعني لينك أو اتنين بالكتير في البوست ويفضل تستخدم الروابط المختصرة زي bit.ly.
8. الهاشتاج مش معمول علشان كل كلمتين تحط هاشتاج في أي كلمة بسبب وبدون سبب! استخدم هاشتاج واحد أو اتنين بالكتير وياريت لو يكونوا معروفين ويكونوا تريند مشهور بشرط إنه يكون مرتبط بنشاط صفحتك والبوست بتاعك أو تعمل هاشتاج خاص بيك انت تحطه في كل البوستات بتاعتك.
