إستهداف الكلمات المفتاحية بطريقة صحيحة 100%
في مدرستين في الموضوع ده
مثال :
طريقة عمل كحك العيد دي الكلمة الرئيسية المستهدفة اللي لازم تبقى موجودة في عنوان المقال
أول مدرسة هتدور علي الكلمات المفتاحية اللونج تيل وهي مثلاً
-
طريقة عمل (كحك العيد فاطمة ابو حاتي)
-
طريقة عمل كحك العيد بالخميرة
-
طريقة عمل الكحك بسكر
-
طريقة عمل (كحك العيد للشيف حسن)
-
وهكذا
وهتحطهم كـ h2 جوه المقال
وتاني مدرسة هتعمل لكل كلمة مفتاحية لونج تيل مقال .
-
يعني هتعمل مقال بإسم طريقة عمل كحك العيد بالخميرة
-
ومقال تاني بإسم طريقةعمل الكحك بالسكر
-
وهكذا
امتي بقى أمشي بالطريقة التانية وأمتي امشي بالطريقة الأولى
في حالة إن الكلمات اللونج تيل أو الكلمات الفرعية هي أصلا كلمات معدل البحث عليها مش كبير مقارنةً بالكلمة الرئيسية يبقى همشي بالطريقة الأولى .
مثال
الكلمة الرئيسية طريقة عمل كعك العيد الناعم
الكلمات الفرعية ليها هي :
-
طريقة عمل كعك العيد الناعم سالي فؤاد
-
طريقة عمل كعك العيد الناعم مثل الجاهز
-
طريقة عمل كعك العيد الناعم للشيف حسن
-
طريقة عمل كعك العيد الناعم بالسمن المقدوح
دي كلمات ضعيفة ومعدل البحث عليها بالنسبة للكلمة الرئيسية لا يتعدى لكل كلمة 10% .
إذاً في اللحظة دي أقدر أطبق النظرية الأولى
وهي إني أخلى كل طريقة أو كل كلمة فرعية h2 في المقال بتاعي وبكده ابقى لميت كل طرق عمل كعك العيد الناعم في مقال واحد .
وده هيخلي الزائر يقعد أكتر وقت في المقال وفي نفس الوقت
لو حد بحث عن أي كلمة فرعية حطيناها h2 هتظهرله في البحث
طيب أية هي بقى العوامل اللي هتخلي جوجل يدي أهمية كبيرة للكلمات الفرعية اللي حطيناها h2 :
-
كرر الكلمة في موضعها علي الأقل مرتين غير المرة اللي في الـ h2 او الترويسة رقم 2
-
ضيف صورة او إتنين عليهم alt بالكلمة الفرعية .
-
إكتب محتوى محترم ومفيد وملخص وأدعمه بشرح واضح ولو قدرت تدعمه بـ فيديو يكون كويس ولكن إحذر لازم تبقى مظبط السرعة كويس جداً لإن حجم اي فيديو 500 كيلو بايت وده بيتقل الصفحة ، وفي بلاجين بتخلي الفيديو ميحملش غير لما تدوس عليه وكذلك اكواد لبلوجر وأي برمجة خاصة .
-
خليك دايما مكان الزائر وبص ع شكل المقال وتنسيقه والوانه وشوف انت لو قريته كده هتبقى مبسوط ومرتاح وعايز تكمل ولا عايز تخرج من اول جملة .
نيجي بقى للطريقة التانية .
وهي إن كل كلمة عندي عليها معدل بحث أزيد من 30% من الكلمة الرئيسية .
مثال :
طريقة عمل البيتزا الكلمة الرئيسية
وكلماتها الفرعية هي :
-
طريقة عمل البيتزا باللحمة
-
طريقة عمل البيتزا بالجمبري
-
طريقة عمل البيتزا بالخضار
-
طريقة عمل البيتزا بالمشروم
لما تيجي تبص جوه كل كلمة فرعية هتلاقي ليها هي كمان كلمات فرعية وهتلاقي إن عليها معدل بحث قوي .
في اللحظة دي يبقى الأفضل تفصل كل كلمة بمقال وتنوع طرق العمل جوه كل مقال .
وتقوم جاي في مقال واحد حاطط طريقة لكل نوع بيتزا وتعمل إنترنال لينك لكل طرق العمل اللي كتبتها في مقال منفصل
وتبقى الكلمة الرئيسية المستهدفة هي طريقة عمل البيتزا
وبكده إنت طبقت النظريتين الأولى والتانية ولكن بصياعة .
نصيحة اخيرة
إهتم دايما بجودة المحتوى وإنه يبقى شامل وبيقدم إفادة كاملة ومتهريش كتير وتلف وتدور خليك صريح وكلامك واضح وبدون الغاز ومتبصش لعدد كلمات ولا لعدد صور ولا لعدد فيديوهات .
بالتوفيق للجميع 
أفضل اقتراحات الارتباط الداخلية.
