تعالي اقولك طريقة تضيع بيها فلوسك
لو معاك قرشين عاوز تطيرهم ف انت هتعمل اللى بقولك عليه دا بالظبط
هتروح تشترك على أي منصة من دول (شوبيفاي – اكسباند كارد – …. ) وتعمل متجر الكتروني
تعمل اشتراك سنوي عشان توفر
تشتري دومين
تروح على ( على اكسبريس ) هتختار منتج
تنزله على الموقع بتاعك وتبدأ تنزله على الفيس والانستا وتعمل ورقة تعلقها على باب بيتكم انك بتبيع المنتج دا
روح اعمل كام اعلان بقا على الفيس
اصرف جامد ما يهمكش
مش شوفت واحد بيقولك هتعمل عشروميت الف جنيه في الشهر ؟
اصرف كمان
ما بيعتش لسه ؟
اصرف كمان وكمان
ها ؟ معرفتش تبيع ؟ استسلمت ؟
يلا قول بقا ان الموضوع دا فاشل وحذر الناس كلها منه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
طبعا الكلام دا بكتبه عشان الفترة الاخيرة حبيت اعمل قسم عندى فى الشركة خاص بالتجارة الالكترونية
وبطبعى ما بعرفش اشتغل في حاجة الا اما اكون فاهمها الاول
دخلت اتفرج على الناس اللى بتشرح لقيت ان معظمهم ان مكانش كلهم الا من رخم ربي
بيقولك تلات خطوات ( اعمل متجر – اختار منتج – بيع )
وطبعا دى اسهل طريقة تضيع بيها فلوسك
عاوز تبدأ في الكلام دا صح ؟ أقولك تعمل ايه
أول حاجة هتتعلم حاجة اسمها (UX) ودي اختصار لتجربة المستخدم عشان تقدر تصمم الموقع بتاعك بطريقة سهلة للي يخش عليه
تاني حاجة تتعلم سيو عشان تخلى الموقع بتاعك يظهر في محركات البحث
تالت حاجة تتعلم ميديا باينج عشان تعرف تختار منتج يتباع وتعرف تعمله اعلانات وتستهدف الناس الصح
مش بس كدا انت قبل كل دا محتاج تعمل استراتيجية تسويقية عشان تعرف هتبدأ امته وهتدفع كام وهتكسب كام وامته
الموضوع صعب ؟
ما تبدأش فى الدروبشيبينح – لو شايف ان دا مشروع حلو وبيكسب خلى حد حد بيفهم فيه يعملهولك وكون انت شريك برأس المال والمتابعة بس
ما تحطش نفسك في حاجة انت مش فاهمها يا اما تفهمها يا اما تشوف حد بيفهمها يعملهالك.
