استهداف ال A+ كلاس ؟!
هو نفسه استهداف ال C كلاس 
الكلام اللي شركات التسويق بتوع اليومين دول مينفعش تفهمولك علشان تقدر انها تاخد منك فلوس ده اذا كانوا يعرفوه من الاساس
طبعا مع كامل احترامي للشركات اللي بتراعي ضميرها في شغلها وفاهمين هما بيعملوا ايه 
طيب ممكن نركز ٥ دقايق قبل ماتهاجموني وليكم مطلق الحريه في النقاش ؟
مبدأيا في فرق شاسع ما بين اللي اتعلمتوة من الكورسات سواء من مصادر اجنبيه او حتي عربيه ” في الغالب بيكونوا ناقلين من محتويات اجنبيه برضو “
وما بين سلوكيات الاسواق العربيه وخصوصا السوق المصري
طيب ليه بقول الكلام ده ؟ لكذا سبب
الاول ان نادرا لما تلاقي اكونت كاتب بياناته مظبوطه
ده بيرجع لكذي نقطه منهم ان شريحه كبيره بيخافوا فعلا من الحسد او انهم مش بيحبوا يظهروا وبيتابعوا في صمت
وشريحه اكبر من الناس اللي حابه تظهر بصوره كويسه فبتكتب مناصب مش صحيحه بغض النظر اصلا عن اللي بيكتبوا
Work at Facebook 
او مدرسة الحب والحياه 
ثانيا ان سلوك العرب عموما في استخدام منصات السوشيال ميديا بيكون بطريقه مختلفه تماما عن الغرب حتي ده بيعمل حاله ارباك لاستخدام هدف الحملات الاعلانيه
يعني تقدر تجرب تعمل حمله ترافيك وهتلاقي اوردرات بتيجي من الكومنت والرسايل عادي
جرب اعمل حمله رسائل وهتلاقي برضو اوردرات من الكومنتات
– طيب هنستخدم اللوكيشن ونحدد اماكن عاليه !؟
= لك ان تتخيل كم الاعداد اللي بتحب تزور الاماكن دي وتعمل check in
– طيب هنخليها الاشخاص اللي ساكنين هنا بالفعل ؟!
= هيدخلك برضو الناس اللي كاتبين اماكن سكن مش حقيقيه
– طيب ما الفيس بوك بيتعامل بالجي بي اس ؟!
= لك كامل الحريه انك تدخل تختار محافظه الاسكندرية علي سبيل المثال وتشوف تحديدها الديموغرافي واصل للواحات والصحراء الغربيه
– طيب هنختار اللي معاه ايفون او موبايلات عاليه ؟!
= احب اقولك ان التقسط مسابش حد الا ومسكه تليفون عالي
– طيب ما احنا ممكن نحط المتسوقون المتفاعلون !
= هتلاقي ان من ٤٠ ل ٦٠ % في شركات كتيره جدا بتشتكي من نسبه المرتجعات العاليه والموضوع متكرر بشكل ملحوظ والاسباب مريبه وغريبه ! اصل انا مسافر اصل انا عندي حاله وفاه ! اصل انا مطلبتش اصلا !!
$ ده بيرجع للثقافه العامه وسلوك العرب في استخدام السوشيال ميديا
– طيب ما احنا هنستهدف البراندات الكبيره ؟!
= هتلاقي ان معظم متابعينهم من الطبقه
المتوسطه والاقل
– طيب هنحط استهدافات ملتويه ونجيب العملاء بطريقه غير مباشره ؟!
= وارد تنجح معاك بس هتقدر تدخل مزادات مع حيتان الله اكبر عليهم بيقولوا بسم الله تجارب ب ١٠٠٠ دولار في اليوم ؟
– طيب …
= هتلاقي
– طيب …
= برضو هتلاقي
طيب انت بتعجزنا ولا ايه مش فاهمين برضو وقولت ليه ان استهداف الA+ كلاس زي استهداف ال C كلاس ؟!
لان السر كله في محتوي البوست و ده انا بعتبره الفلتر والاستهداف بتاعي اللي هيدخلي العميل اللي انا محتاجه
= ببساطة شديده انت اللي بتحدد مين يدخلك ومين ميدخلكش عن طريق تقديمك بصوره تناسب الشريحه اللي محتاج توصلها سواء بطريقه الكلام او الميديا اللي بتستخدمها او طريقه بيعك وعرضك علي العميل بعد ما يدخلك وكل المراحل اللي هيعدي عليها بطريقه تناسبة وتلبي احتياجاته وعقليته وتخليه ياخد قرار الشرا وهو مستريح
العميل اللي يدخلك لازم يكون اخد فكره محترمه من كونسبت البوست علي انك بتقدم ايه يناسبه ورينج اسعار تناسبة وكواليتي او خدمه اضافيه تناسبة
واي حد تاني ميدخلش بقدر الامكان
مهتمين اشرح اكتر ولا بطول في الكلام وبتزهقوا بسرعه
