هدية عيد الأم وعلاقتها بالتسويق
▪️أول ما يبتدي شهر مارس أول حاجة بتخطر في بالنا هو يوم 21/3 يوم عيد الأم ، وزي ما مصطفي أمين كرم أمهاتنا وعملهم يوم مخصوص لتكريمهم، كلنا بقينا نحتفل باليوم ده وبنعبر لأمهاتنا عن مشاعرنا تجاهم وحبنا ليهم بتقديم هدية حتى لو بسيطة في اليوم ده 🥰
طب ازاي كلنا بنستعد وبنرتب لليوم ده 🤔
بدءاً من عمل ميزانية مسبقة للهدية، لتحديد نوع الهدية، لشراء الهدية، لطريقة عرضها ونيجي لأصعب وأهم خطوة وهي اقناعها بالهدية 🤨
وهنا بقي بيطلع دور sales person اللي جوانا وبنتحول لسيلزاوية بقدرة قادر وازاي بنستخدم مهارات البيع والإقناع في عرض وتقديم هدية عيد الأم.
ورقة وقلم يا ست الكل واكتبي معايا الوصفة السحرية لخطوات البيع الذكية والإقناع بالهدية بصوت الشيف الشربيني 😂😂
1- الـ Prospecting:
وهنا بقى بتبتدي خطة البحث عن الهدية وإختيار نوع الهدية بما يتوافق مع إحتياجات أمهاتنا أو شعورنا بإن الهدية دي أكتر حاجة ممكن تفرحهم.
2- الـ preapproch:
وهو التحضيرالمسبق ليوم عيد الأم بدءاً من يوم 1/3 ليوم 21/3 من توفير الميزانية، لإختيار نوع الهدية، لإختيار المكان اللي هانشتري منه الهدية 👩💻👨💻
3- الـ Approach:
هنا بقي التحضير الفعلي يوم 21/3 من تزيين البيت لعمل أو شراء التورتة، لتحضير الهدية وتغليفها.
4- الـ presentation:
هنا بقي ازاي نلف الهدية بشكل جمالي يشد إنتباها ويعجبها، لإختيار الوقت المناسب لتقديم الهدية، لإختيار الجمل والكلمات العاطفية اللي تعبر عن القيمة والمعنى الحقيقي من شراء الهدية.
5- الـ Objection:
وهنا بقى ربنا يستر لوماعجبتهاش الهدية واعترضت عليها وقتها يا وقعتك السودا يا أرمط، وألطمي يا إنشراح علي اللي اتصرف وراح 😱😱
وهنا لازم تبقي جاهز بسلاح التفاوض والإقناع وتتبع الآتي:
• لازم تسمعها كويس وتعرف ايه وجه إعتراضها على الهدية.
• بعد ما تفهم وجه اعتراضها أوجد أرضية مشتركة ما بينكم للتفاوض
• اتبع نظرية win win situation وإقناعها بأهمية الهدية وإنها أفضل هدية موجودة على وجه الكرة الأرضية 🤗
لو اتبعت التالت خطوات دول هاتقدر تقنعها بالهدية وأنتو الإتنين هاتبقوا كسبانين، هي هاتكسب الهدية وأنت هاتكسب رضاها عنك وعن الهدية. 🤝🤝
علي سبيل المثال طقم الكوبايات اللي بنقدمه كل سنة لأمهاتنا في عيد الأم وازاي بنقنعها بنفس الهدية مع إختلاف بسيط في شكل الكوبايات ونوعها.
6- الـ Closing:
وهنا بقى بعد اتباعك لكل الخطوات السابقة بتكون نجحت وحققت هدفك البيعي وهو رضائها عنك واقتناعها بالهدية وهنا نقولك حمد الله على سلامة الوصول لقلب وعقل ست الحبايب.
7- الـ Follow up:
هنا بقى لازم نتابع إستخدام أمهاتنا للهدية وطول الوقت نفكرها بأننا اللي جايبين الهدية عشان تفضل تحبنا وتدعيلنا 🙏
وهنا ناخد بالنا إن كل واحد فينا جواه رجل بيع بيطلع وقت اللزوم وبتظهر قدراته البيعية ومهاراته حسب المواقف.
