مشاكل قابلتني في التسويق بالسعوديه

ان عندي مشكلة غير مفهومة في الماركت السعودي
وهي ان في عدد كبير جداً من المنتجات بيتم وضعها في السلة يومياً من العملاء بدون أي عملية شراء

العدد كان كبير ، يعني يومياً بيكون في حوالي من 100لـ 150 منتج بيتم وضعهم في السلة من أكتر من 90 عميل بس اللي بيشتري هما نسبة لا تتعدى الـ 12% من الرقم ده!

ال behavior ده كان غريب، مبيشتروش ليه!؟ فقررنا نعمل تراك على حركة المستخدم جوه الموقع، خاصة ان ارقام ال analytics مميزة، الـ Bounce rate قليل 20% واليوزر بيقضي على الموقع متوسط 4 دقايق..

لقينا ان اليوزر بعد مايخلص تسوق ويحط كل المنتجات اللي عاوزها في السلة، بييجي عند آخر خطوة بتاعة الدفع ويقف ويقرر ميدفعش ويخرج، مع ان تقريباً كل وسائل الدفع المتاحة متوفرة، ومنهم دفع عند الاستلام، وكمان خيارات شركات الشحن كتير.

المشكله كانت هي الضريبة.. في ضريبة 15% على المنتجات في السعودية، فاحنا كنا بنحط السعر في الموقع بدون الضريبة ونسيب الموقع هو اللي يضيف 15% اوتوماتيك على السعر..

فالعميل لما يروح للدفع بيلاقي في الفاتورة ان في تكاليف اضافية على توتال السعر وهما الضريبة الـ 15% وتكلفة الشحن فبيقرر ميدفعش ويخرج.

فقررنا نلغي التقسيمة دي خالص ونخلي الأسعار اللي ظاهرة في الفاتورة في الآخر هي نفس الأسعار اللي العميل شافها في الموقع مضاف ليها الشحن فقط.. والنتيجة كانت ان نسبة المبيعات من المنتجات اللي في السلة ارتفعت بنسبة أكتر من 50%