إعادة الاستهداف وكيف بتحسن نتائج الحملات

فيه أكتر من طريقة لاعادة استهداف العملاء من خلال إعلانات جوجل, ممكن نقول إن أهمهم:

1- ربط حساب جوجل أدس بالموقع مباشرة عن طريق كود برمجي وبالتالي أقدر استهدف زوار صفحات معينة في موقعي بإعلانات تظهرلهم بعد ما يسيبوا موقعي.

2- ربط حساب جوجل أدس بحساب جوجل أناليتكس, وأكون قوائم مفصلة للعملاء بإستخدام جوجل أناليتكس استخدمها كجمهور مخصص في حملات جوجل أدس.

الطريقة التانية أنا بفضلها عن الأولى لأن جوجل أناليتكس بيوفرلي كمية بيانات قوية جدا أقدر من خلالها أكون قوائم جمهور دقيقة..طيب السؤال أعمل كده إزاي؟

ممكن نقول إن إعادة الاستهداف باستخدام جوجل أدس بيمر ب 3 مراحل:

1- ربط جوجل أدس بجوجل أناليتكس وده ممكن أعمله من أي منصة منهم, لكن خلي بالك لازم تكون عامل الحسابين بنفس إيميل الـ Gmail و بعدها افتح الحسابين وإعمل عملية الربط

من خلال جوجل أناليتكس : هتروح ل admin ومنها google ads linking وتكمل باقي الخطوات.

من خلال جوجل أدس : هتروح على set up ومنها linked account وتختار google analytics

2- إنشاء جمهور مخصص ,

هنروح على جوجل أناليتكس ونختار الـ audience ومنها نختار audiences ثم all users , هيظهرلك بعض المقترحات للجمهور وكمان هتلاقي زرار اسمه new segment , لما تضغط على الزرار ده هيظهرلك مجموعة خصائص تقدر من خلال تنشىء قائمة بالجمهور,

الخصائص دي تشمل صفات معينة للجمهور زي السن والمكان والنوع واللغة وخصائص تانية متعلقة بسلوكه في الموقع وزار أي صفحات وزيارته استمرت أد إيه ,

ومن الخصائص دي تقدر تكون توصل للجمهور اللي في كل مرحلة من مراحل رحلة العميل في موقعك بحيث تستهدفه بالرسالة المناسبة ليه.

3- تصدير قائمة الجمهور المخصص إلى جوجل أدس

بعد ما حفظت قائمة الجمهور , هتضغط على السهم الصغير اللي جنب اسم القائمة هتظهر قائمة منسدلة , إختار منها Build audience , تابع الخطوات لغاية لما توصل لـ publish , وده معناه إننا كده شاركنا القائمة دي مع جوجل أدس وتقدر تتأكد من كده لما تروح لجوجل أدس وتفتح ال audience manger هتلاقي الجمهور المخصص المحفوظ في حسابك.

4- إطلاق الحملة على جوجل أدس

هنروح على جوجل أدس ومنها ننشىء حملة عادي خالص, لكن لما نيجي لخطوة ال audience هنختار browse ومنها How they have interacted with your business وهتلاقي تحتها قوائم الجمهور المخصص اللي كونتها في جوجل أناليتكس , وبرضه هتلاقي القوائم دي لو عملت عنها search وكمل خطوات الحملة عادي خالص.