ازاي تاخد بريف من عميلك كماركتير؟
1- CONTACT DETAILS
لازم طبعاً تعرف المعلومات الأولية عن العميل أو الشركة اللي بتشتل معاها ويفضل يكون في شخص واحد بس هو ممثل الشركة وبتسأله عن أفضل طريقة للتواصل معاه زي الميل أو الواتساب ومواعيد التواصل ألخ وبتحاولوا تنسقوا الموضوع.
2- Project Overview/Scope:
بتحاول تاخد أكبر قدر من المعلومات عن البيزنس وايه المشكلة اللي بيحلها ومدى جودة المنتج بالنسبة لسعره وأماكن التوزيع ان وجدت ولو في بيزنس بلان واضحة يبقى مصلحة بس عادة هتلاقيها كلام انشا فركز في البريف.
3- Objectives:
هتحاول تعرف أهداف واضحة للبيزنس وليه هو محتاجك متكتفيش بكلمة خد المنتج أهو سوقهولي.
4- Target Audience:
حاول تفهم كويس من عميلك مين شرائح العملاء المستهدفه من البيزنس ده ومدى فهمه للنيد اللي عند العميل وبيحاول يشبعها ازاي ومتستغربش لو كان مش عارفهم بالظبط .
5- Competitors:
دي حاجة غالباً هيكون عارفها وهم المنافسين بتوعه في السوق والحصة السوقية بتاعة العميل بالنسبة لهم بس غالباً هتلاقي العميل عايز يكون زيهم خلال شهرين فلازم توضح البروسيس بتاعتك وتدرس المنافسين كويس.
6- Competitive advantage:
حاول تفهم الميزة التنافسية اللي عند عميلك وحاول تفهم انت ان الميزة التنافسية مش نقاط القوة اللي عنده ولكن هي الحاجة اللي عنده ومش عند غيره لفترة مش أقل من 6 شهور مثلا وفهمه ان لو معندوش ميزة تنافسية ميعلاش بسقف الطموح ولا يتعامل باندفاع في السوق عشان ميتعصرش.
7- Marketing Guidelines:
اعرف لو في أي تجارب تسويقية حصلت قبل كده مع العميل وايه نتايجها وليه مكملتش وحاول تستشف الغلط كان من استعجال العميل ولا عيب في المسوق أو الشركة المسوقة.
8- Call to Action:
اعرف الشركة عندها ويب سايت – ابلكيشن – قنوات سوشيال ميديا ايه وطريقة البيع وان العميل يبقى أكتيف بتكون ازاي في البروسيس بتاعتهم
9- Branding:
هل في هوية جاهزة عند عميلك وهل هي مناسبة لأهدافه ولو مش موجودة اتناقش معاه في الهوية والألوان والخطوط والاستايل العام والتون اللي المفروض يناسب الفئة اللي بيستهدفها ألخ.
10-Timeline, Schedule:
اتفقوا علي المواعيد امتى البداية؟ امتى هو عايز يوصل لهدف معين ؟ايه المدة اللي يتوقع عميلك انه هيستخدم فيها خدماتك ودي مهمة ليك انت وشغل سينسور الصدق والكذب قبلها.
11- Budget:
حاول تعرف البادجيت اللي عند العميل للتسويق ككل عشان تعرفه ان الطموح ليه تمن لو مفيش بادجيت معروفة افهم عايز ايه واقترح عليه تقدر تقدم ايه ودا هيتكلف كذا ودي بخبرتك انت وتسعيرك لخدماتك .
12- Other Requests & Notes:
اتكلم مع العميل لو في أي حاجة عنده حابب يقولها أو تجربة شافها وعجباه عشان غالباً هيقعد يقارنك بيهم كل يوم حتى لو البادجيت اللي معاك خمسه دولار فلازم تفهم كل حاجة.
البريف مهم جداً لأنه يعتبر زي عقد بينك وبين عميلك وعلى فكرة بيدي انطباع لعميلاك انك بروفيشنال وفاهم شغلك كويس ولما يحصل سوء تفاهم بينكم هي بتحله وبتقدروا تعيدوا هيكلة الأمور مرة تانية في صالح الطرفين.
