حملات الفيسبوك

في البداية كده خلينا نتذكر مع بعض معلومة مهمة وهي إن العميل بيمر ب 3 مراحل متتالية علشان يشتري من حضرتك:

أولا…مرحلة الوعي بالعلامة التجارية

ثانيا…مرحلة التفاعل والإهتمام بمنتجك أو خدمتك

ثالثا… مرحلة الشراء

كلا النوعين (الـ Reach و Brand awareness ) بينتموا للمرحلة الأولى اللي هيا مرحلة الوعي بالعلامة التجارية,

________________________________________

يعني وظيفتهم إنهم يعرفوا العميل المحتمل باسم شركتك ونشاطها التجاري, وليس هدفهم دفع العميل للشراء, وبالتالي لازم تخلي بالك من نقطتين :

1- نوعين الحملات دول لا تنتظر منهم مبيعات مباشرة

2- نوعين الحملات دول بيحتاجوا حملات أخرى مكملة تنقل العميل للمرحلة التانية أو التالتة

________________________________________

طيب إيه بقى الفرق بينهم؟

حملة الـ Reach بيكون هدفها توصل إعلانك لأكبر عدد ممكن من الأشخاص (بغض النظر عن جودتهم , يعني هل هما عملاء محتملين أو حتى مهتمين ولا لأ) يعني حملة الـ Reach هدفها كمية quantity مش جودة quality .

وبنقيس مدى نجاح الحملة بهيا وصلت لكام شخص (الوصول لأكبر عدد بأقل تكلفة )

أما حملة الـ Brand awareness بيكون هدفها الوصول لأشخاص قد يتذكروا علامتك التجارية (المقياس هنا بالنسبة للفيس بوك إن الناس دي لو إتسألت عن علامتك التجارية بعد يومين من رؤيتهم للإعلان هيفضلوا فاكرينه) ,

وبالتالي جودة الأشخاص هنا (كعملاء محتملين) أعلى من جودتهم في الحالة الأولى .

علشان كده مقياس جودة حملة الـ Brand awareness بيكون حاجة اسمها الـ Estimated Ad Recall Lift ودي بتعبر عن نسبة الأشخاص شافوا الإعلان وممكن يتذكروا علامتك التجارية بعدها بيومين,

دي بتكون نسبة تقريبية الفيس بوك بيعرفها من متابعته وتحليلة لسلوك العملاء, عادة بتكون 9% لكن ممكن تزيد لغاية لما توصل لـ17% أحيانا.

________________________________________

بالمناسبة التكلفة هنا بتكون أعلى

فمثلا لو الوصول لـ 1000 شخص في حملة الـ Reach هيكلفك 15 جنيه ففي حملة الـ Brand awareness هيكلفك 20 أو 25 ج.

________________________________________

ركز بقى في الحتة الجاية دي لو سمحت:

لو عايز تنقل العميل للمرحلة التانية من قمع التسويق (مرحلة الإهتمام) إعمل مزيج بين حملتين ( حملة Reach و حملة Traffic )

أما لو عايز تنقل العميل للمرحلة التالتة فإعمل مزيج بين حملتين ) حملة الـ Brand awareness و حملة الـ messages أو leads أو conversion)

ساعتها النتايج هتكون كويسة جدا إن شاء الله وأصبر على الحملات وبلاش استعجال مادامت مظبط كل حاجة.

________________________________________

ملاحظة: المقصود بالمزيح هو إنك تشغلهم مع بعض أو إنك تشغل حملة الوصول Reach أو التوعية Brand awareness الأول ثم بعدها مباشرة الحملة التانية.

د. محمد