كنز إعادة الاستهداف للحملات التسويقية
د.ابوالعمايم
كنز إعادة الاستهداف للحملات التسويقية
موبايلك بيستغيث, بيقولك إرحمني وأطلق عليا رصاصة الرحمة💔,
فحضرتك قررت تغير الموبايل,
دخلت تقلب في بعض المواقع علشان تعرف الأسعار والمواصفات,
وكان منهم موقع سوق دوت كوم,
قفلت الموقع و قررت تأجل الفكرة شوية أحسن لغاية لما الظروف تتحسن, بس “تتحسن” ما سبتكش في حالك,
إنت لاقيت كمية إعلانات على الفيس بوك عن موبايلات في سوق دوت كوم , وخصومات وعروض,
في النهاية إنهرت ورفعت الراية ابيضا وقررت تشتري وتلحق العرض.
إشتريت الحمد لله الموبايل, وضميرك كان بيأنبك على المبلغ اللي دفعته, بس شغلت نفسك بالموبايل الجديد وقولت تدخل على الفيس منه,
وبعد كام يوم لاقيت كمية إعلانات كتير عن إكسسورات للموبايل (جراب و سكرينة وسماعة و….) مغرقة الفيس عندك ,
قعدت تقول لنفسك يعني أدفع المبلغ ده وفي الاخر ماجبش الحاجات المهمة دي ؟! ,
على الأقل علشان أحافظ عليه,
وفعلا دخلت تاني على سوق دوت كوم (اللي هيا أمازون) تاني واشتريت المنتجات المكملة دي👎.
🔥 هو إيه بقى اللي حصل..وليه الإعلانات دي ظهرتلك إنت بالذات؟
ده موضوعنا النهارده,
✔️ هنتكلم عن “إعادة الاستهداف remarketing ” ,
خلينا نقسم الكلام لفقرات كالتالي 👇:
1- يعني إيه إعادة استهداف؟
2- إيه أنواع إعادة الاستهداف؟
3- ليه إعادة الاستهداف مهم؟
4- إزاي أعمل إعادة الاستهداف؟
5- إيه أهم تطبيقات إعادة الاستهداف؟
6- إيه أدوات إعادة الاستهداف؟
7- هل إعادة الاستهداف مقتصر على المواقع والمتاجر الإلكترونية فقط؟
✔️ أولا: يعني إيه إعادة الاستهداف؟
بص يا غالي, إعادة الاستهداف هو إن عميل دخل على موقعك (أو تطبيقك) قبل كده, فتظهر له إعلاناتك من جديد, وبالتالي هو عنده خليفة وإهتمام ما بموقعك فإنت عايز تتطور الإهتمام ده علشان تخليه ياخد الخطوة التالية , مثلا هو زار موقعك بدون ما يسجل فيه فإنت عايزه يسجل, وهكذا
✔️ ثانيا: إيه أنواع إعادة الاستهداف؟
إعادة الاستهداف نوعين ⏬ :
1-إعلانات قائمة على كود برمجي Pixel-based ads
هنا حضرتك بتضيف كود برمجي بسيط لموقعك, الكود ده هدفه إنه يجمع معلومات عن زوارك بحيث يتم الاستفادة من المعلومات دي لاستهدافهم بإعلانات
ناخد مثال👇:
حضرتك ضفت الفيس بوك بيكسل على موقعك , بحيث تم تعقب العملاء اللي زاروا الموقع لكن ما سجلوش فيه, وبالتالي بقى عندك إمكانية تعملهم إعلانات مخصصة تشجعهم على التسجيل في موقعك.
الكود البرمجي ده موجود في كل منصات السوشيال ميديا تقريبا (فيس بوك , تويتر , انستجرام, اسناب شات,..) , يعني مثلا : تقدر تاخد الكود ده من تويتر وتعمل إعادة استهداف لزوار موقعك من خلال إعلانات على تويتر, وطبعا تقدر تعمل تخصيص من جوه تويتر كمان, يعني مثلا زار موقعك 1000 زائر, منهم 400 من السعودية, وإنت عايز تستهدف السعوديين فقط, فتقدر تخلي تويتر يستهدف ال400 واحد دول فقط, أو بمعني أصح اللي عندهم حسابات على تويتر من ال400 واحد دول.
💡ملاحظة : فيه بعض الأدوات المتقدمة بتوفر عليك إنك تاخد كود برمجي من كل موقع سوشيال ميديا, إنت بتاخد الكود من عندها وهي بتربطلك بمختلف المواقع دي وبتعمل الإعلانات من خلال الأداة مقابل إشتراك شهري أو نسبة على الإعلانات (هنذكر أسماء بعضها في اخر البوست)
2-إعلانات قائمة على القوائم List- based ads
هنا بقى حضرتك بتجمع بيانات عن عميلك تقدر تستخدمها علشان تظهرله إعلانك
ناخد مثال👇:
إنت عامل في موقعك خاصية الإِشتراك في قائمة بريدية, فجه عدد من الزوار اشتركوا, ساعتها حضرتك تقدر تستفيد من الإيميلات دي إنك تستهدفهم بحملات مخصصة ليهم هما فقط, ونفس الكلام لو إنت معاك أرقام تليفوناتهم, فساعتها لو هتعمل إعادة استهداف على الفيس بوك, فالفيس بوك هيظهر إعلانك لأصحاب الحسابات المتسجلة من خلال أرقام الهواتف دي.
ملاحظة مهمة⏬:
فيه نوع تالت من الإعلانات وهو بيكون جوه منصة التواصل الإجتماعي نفسها, يعني بدون ما يكون عندك موقع أصلا, حضرتك مثلا تقدر تعمل حملة إعلانية تستهدف زوار صفحتك على الفيس يوك خلال اخر 6 شهور, أو تعمل حملة تستهدف بيها اللي شاف 50% من فيديو معين مرفوع على صفحتك على الفيس بوك.
✔️ ثالثا: ليه إعادة الاستهداف مهم؟
وفقا للإحصائيات أقل من 2% من الزوار هما اللي بيكملوا الخطوة التالية (سواء كانت شراء أو تسجيل أو غيرها) وأنا اعتقد إن في وطنا العربي النسبة أقل من كده بكتير🔥, يعني حضرتك على الأقل بتفقد 98% من زوار موقعك, فالطبيعي إنك تحاول توقف النزيف ده من خلال إعادة استهدافهم, لا سيما إنهم زاروا موقعك قبل كده وبالتالي عندهم خلفيه واهتمام ما بيه.
زي ما قولنا قبل كده إن التسويق بيتلخص في كلمتين (الاستهداف + الإقناع), يعني 50% من التسويق الصح هو إنك توصل للعميل الصح, من أهم طرق الوصول للعميل الصح هي “إعادة الاستهداف”… ولازم تكون عارف برضه رحلة العميل بتاعك ..شرحنا موضوع الرحلة (أو القمع) في بوست سابق, وقولنا إن عميلك بيمر غالبا ب 4 مراحل أساسية (الإنتباه ثم الإهتمام ثم الشراء ثم إعادة الشراء وتوصية الاخرين)…طيب نفترض إن عندك عميل هو في مرحلة الشراء وإنت قاعد تعمل إعلانات عامة بتحث وتشجع فيها العملاء على التسجيل ,وبما إنك مش عامل إعادة استهداف صح فإعلانك ظهر للعميل ده, هل إنت كصاحب بيزنس أو هو هيستفاد حاجة من الإعلان؟ لأ..إنت رميت فلوس على الأرض لأنك عملت استهداف خااااطىء, بينما لو إنت استهدفت العميل ده بإعلان يشجعه على إعادة الشراء أو على توصية اخرين بمنتجك كنت كسبت منه كتير.
الخلاصة: إعادة الاستهداف بتخليك قادر على توجيه الرسالة الإعلانية المناسبة لكل شريحة من عملائك وبالتالي تقدر تزود العائد المنتظر منهم, مثلا جوجل بتقولك إن إعادة الاستهداف بيزود معدل التحويل بنسبة 128% , وفيه إحصائية تانية بتتكلم على إن 26% من المسوقين اللي استخدموا إعادة الاستهداف زادت مبيعاتهم, طبعا دول اللي عملوا اعادة استهداف صح, وإحضائية تالته بتتكلم على بعض الحالات بيزيد فيها التفاعل على الإعلانات بنسب تصل إلى 400% , وهكذا.
حملات إعادة الاستهداف كنز كبير, كل لما تمارس إعادة الاستهداف بطريقة سليمة كل لما هتزود بشدة العائد على الاستثمار من خلال الإعلانات ROI .
✔️ رابعا: إزاي أعمل إعادة الاستهداف؟
الأول لازم تصمم صح الرحلة اللي بيمر بيها العميل بتاعك, وتبقى فاهم كويس خصائص العميل ده buyer persona , وبعدها تبدأ تخصص لكل مجموعة عملاء الإعلانات المناسبة ليهم على المنصة المناسبة ليهم, وطبعا معظم مواقع السوشيال ميديا عندها خاصية إعادة الاستهداف, ومن أبرز المنصات اللي ممكن تعمل من خلالها إعادة الاستهداف: جوجل وفيس بوك, وهتلاقي على اليوتيوب شروحات كتير عن الاتنين وإزاي تضيف الكود على موقعك وإزاي تقدر تعمل تكامل بين Google analytics وبين Google ads .
✔️ خامسا: إيه أهم تطبيقات إعادة الاستهداف؟
تعالوا ناخد شوية أمثلة نفهم بيها ممكن إزاي نستخدم إعادة الاستهداف:
1- ممكن تستهدف الزوار اللي زاروا موقعك لكن مسجلوش فيه وبالتالي تظهرلهم إعلانات تستهدف تشجيعهم على التسجيل في موقعك أو تطبيقك
2- ممكن تستهدف الزوار اللي بقالهم شهر مادخلوش موقعك وبالتالي عايز تقولهم إن فيه جديد في الموقع ويالا تعالوا شوفوا الموقع وتفاعلوا تاني معاه
3- ممكن تستهدف المستخدمين اللي زاروا موقعك لكن ما اشتروش لغاية دلوقت وبالتالي محتاج تشجعهم إنهم يبدئوا عملية الشراء
4- ممكن تستهدف المستخدمين اللي اضافوا بعض المنتجات في عربة التسوق لكن ماكملوش عملية الشراء وبالتالي تظهرلهم إعلانات بخصومات أو عروض خاصة تشجعهم على إتمام عملية الشراء
5- ممكن تستهدف العملاء اللي اشتروا منك لكن إنت عايز تعمل cross selling يعني هو اشترى موبايل فإنت عايز تبيعله اكسسورات للموبايل, أو اشتري لاب فإنت عايز تبيعله شنطة لاب , أو اشترى كريم وإنت عايز تبيعله سيرم أو شامبوا مع الكريم, وهكذا.
6- ممكن تستهدف العملاء المعتادين على الشراء من عندك وتشجعهم على الاشتراك في برنامج للتسويق بالعمولة بحيث تحولهم من عملاء فقط إلى كمان مسوقين.
✔️ سادسا: إيه أهم أدوات إعادة الاستهداف؟
الأدوات كتير..لكن الأهم هما👇:
1- Facebook Custom Audiences
2- Google Ads retargeting tool
3- Instagram Retargeting Ads
4- Twitter’s Tailored Audiences
5- AdRoll
6- MailChimp
7- Criteo
8- Retargeter
9- Fixel
10-Sizmek
💡هتلاحظ حضرتك إن الأدوات نوعين, نوع خاص بمنصات السوشيال ميديا أو مواقع البحث مباشرة ونوع اخر عبارة عن ادوات بتسهل عليك إعادة الاستهداف وبتكون وسيط بينك وبين منصات السوشيال ميديا
أنصح حضرتك بالتالي (بالترتيب)👇:
1- إتعلم الأول إعادة الاستهداف على فيس بوك و جوجل
2- لو ليك شغل على الانستا و تويتر فخلي دي تاني خطوة وإتعلمهم كويس بعد الفيس بوك و جوجل
3- إتعلم ال Adroll ودي أداة محترمة جدا
4- إتعلم إعادة الاستهداف من خلال الإيميلات عن طريق MailChimp
✔️ سابعا: هل إعادة الاستهداف مقتصر على المواقع والمتاجر الإلكترونية فقط؟
ده من الإعتقادات الخاطئة عند البعض, وعايز أقول لحضرتك إن لو عندك مشروع على الأرض وماعندكيش أي موقع تقدر برضه تستخدم إعادة الاستهداف..ناخد أمثلة👇:
1- عندك معمل تحاليل, فكل مريض بيعمل تحليل بيكتب رقم تليفونه, حضرتك بتجمع أرقام التليفونات دي وتبدأ تعملهم استهداف, الفيس بوك بيسمحلك إنك تستهدف العملاء من خلال ارقام الهواتف, وبالتالي ممكن كمان تقسم العملاء بتوعك وتخصص إعلان لكل منهم, مثلا دول عملاء بيعملوا تحاليل للاطمئنان على الصحة فأنا هستهدفهم بإعلان خاص, أما دول فبيحللوا دايما سكر تراكمي وبالتالي هعملهم إعلانات موجه ليهم وهوضحلهم إيه التحاليل التانية اللي مفروض مريض السكر يعملها علشان يطمن على نفسه, أما مجموعة أرقام الهواتف دي فبتاعت أطباء فانا عايز استهدفهم بإعلان يحسسهم بمدى دقة نتايج المعمل بتاعي وإن اسعاره معقولة بحيث يرشحوه للمرضى بتوعهم…وهكذا.
2- حضرتك عندك عيادة, فهتبدأ تخلي السكرتيرة تسجل كل أرقام هواتف المرضى وتعمل فيديوهات تعليمية بسيطة تسهدف بيها المرضي دول, كنوع من التسويق بالمحتوى, عايزك تتخيل مدى فرحة بعضهم وهو شايف الدكتور اللي بيكشف عنده فيديوهاته بتظهر على الفيس كل شوية (هو مش هيبقى عارف إنها بتظره ليه لوحده هو والعملاء اللي زيه بس), وكل شوية يقعد يشير ويقول لأصحابه “ده الدكتور اللي بتابع معاه, ده صاحبي ومعايا رقمه لو احتجتوه”, ونفس الكلام لو عندك مركز تخسيس مثلا أو جيم وبدأت تعمل دمج بين التسويق بالمحتوى وإعادة الاستهداف, ساعتها هتوصل لنتايج ممتازة إن شاء الله.
3- حضرتك منظم مؤتمر أوايفينت ما, ففيه مجموعة من العملاء قالوا إنهم مهتمين من خلال صفحة الإيفينت وجزء آخر قال إنهم أكيد هيحضروا, فتقدر تستهدف العملاء الأولانين علشان تحولهم لحضور أكيد إن شاء الله.
4- عندك مطعم, تقدر تسجل أرقام الهواتف (تقولهم مثلا إن فيه عروض خاصة ومحتاجين أرقامكم علشان برنامج العملاء المميزين) وتبدأ تعرض للعملاء دول خصومات وعروض خاصة ويحسوا إنك دايما حواليهم وده هيزود ثقتهم فيك وبالتالي هيزود معدل البيع.
الأمثلة كتير بس نكتفي بالقدر ده
💡ملاحظة:
فيه فرق بين ال remarketing وال retargeting …الأولى غالبا بتطلق على إعادة الاستهداف عن طريق الإيميل أما التانية فعلى إعادة الاستهداف من خلال السوشيال ميديا وجوجل…عايز حضرتك بقى تنسى المعلومة دي لأنها معلومة نظرية مالهاش أي ستين لازمة, وهما غالبا بيستخدموا بنفس المعنى في مقالات على أكبر المواقع العالمية.
في النهاية ⏬
عايز اقول لحضرتك إن موضوع إعادة الاستهداف مهم جدا وطبعا فيه تفاصيل تانية كتير, إن شاء الله هنتكلم عنه تاني وتالت قريب, بس مش عايز أطول المره دي عن كده.
