ايه هي الـ Word Of Mouth ؟
![ايه هي الـ Word Of Mouth ؟](https://efhmtaswek.com/wp-content/uploads/2023/06/ايه-هو-الورد-اوف-ماوس.png)
ايه هي الـ Word Of Mouth ؟
طبعًا التسويق لا غنى عنه في أي مكان بيقدم منتجات أو خدمات معينة ، لأن التسويق هو حلقة الوصل بين الشركة والعملاء وهو الأساس في الوصول لعملاء جدد بطرق مختلفة وغير تقليدية وده من خلال الاعلانات والحملات الاعلانية والانترنت و وسائل التواصل الاجتماعي ، لكن في الحقيقة في تسويق من نوع مختلف ومش مرتبط بأي تكلفة نهائي ، طيب ايه هو ؟
الـ Word Of Mouth أو WOM هو التسويق الشفهي ،
بمعنى انه تسويق لمنتجك أو خدمتك وتسويق للعلامة التجارية عن طريق عميلك ، وبيكون تسويق بدون أي تدخل من الشركة وبيتم بشكل غير مخطط له ، لأن العميل الخاص بيك اللي استخدم منتجك أو جرب الخدمات اللي بتقدمها بينقل تجربته للأشخاص المقربين ، وبيقول رأيه بايجابيه في المنتج أو الخدمة وتفاصيلها وده طبعًا في حالة تحقيق رضا العميل .
ومن خلال الخطوة دي بيزيد عدد العملاء المحتملين اللي عرفوا عنك علامتك التجارية من شخص قريب منهم وبالنسبالهم مصدر ثقة ، وبالتالي أكيد هيتأثروا وهياخدوا خطوة تجاه شركتك .
ونظرًا لأهمية التسويق الشفهي وصعوبته في نفس الوقت لأنه متوقف على رأي وتجربة عميل من عملائك ، فـ لازم تهتم بـ :-
جودة المنتج أو الخدمة المقدمة ، لأن كل ما كانت الجودة كويسة كل ما هيزيد رضا العميل ويتكلم عن علامتك التجارية بشكل ايجابي .
ابتكارك لأفكار مختلفة عن المنافسين تطور بيها المنتج أو الخدمة بحيث تكون متميز في السوق .
متابعة العملاء باستمرار والاهتمام بآرائهم ومشكلاتهم وحلّها لأن ده هيزود ثقة العميل في علامتك التجارية .
تكون حريص انك توفر متطلبات واحتياجات العملاء بالشكل المناسب ليهم لأنهم أساس نجاحك .