متى بدأ التسويق ؟
طبعًا كلنا عارفين ان التسويق حاليًا يعتبر أساس نجاح الشركات وكمان الأشخاص اللي بيقدموا منتجات أو خدمات مختلفة من خلال انهم بينفذوا احتياجات العملاء و طلباتهم وده اللي بيساهم في زيادة المبيعات وزيادة الأرباح على المدى البعيد .
التسويق يعتبر علم وفن ظهر وتطور بشكل تدريجي ، وكانت بداية ظهوره في فترة الثورة الصناعية اللي حصلت في بداية القرن الثامن عشر واستمرت للقرن التاسع عشر وخلال الفترة دي حصل تغييرات كتير وأهمها ان بدأت عمليات البيع والشراء لمنتجات مختلفة وده نتج عنه وجود فائض أو زيادة من المنتجات أكتر من احتياجات المستهلكين .
ومن هنا بدأ اصحاب المصانع يعرفوا احتياجات المستهلكين ويبدأوا ينفذوها بالشكل المطلوب عشان يتجنبوا أي فائض ويبعدوا عن انتاج منتجات مش مطلوبة.
وبالوقت زادت المنافسة وزادت المنتجات المتشابهه في الأسواق ، وبدأ كل شخص يستخدم طرق تطوير جديدة وأساليب مختلفة عشان يقدر يقنع المستهلك انه يشتري المنتج الخاص بيه .
ومع زيادة احتياجات المستهلكين وزيادة الانتاج والمنتجات في الأسواق ، كمان زادت عمليات الاقناع والتطوير و زاد الجهد في تقديم افضل خدمة أو منتج بجودة كويسة ، وظهرت دراسات السوق والمستهلكين وآرائهم ومتطلباتهم ، وعملية التسويق بقت عميقة أكتر من الاول ومن هنا بدأ يظهر مناصب خاصة بعملية التسويق .
وفي أواخر القرن العشرين وبداية القرن الواحد وعشرين بدأ يظهر مفهوم التسويق من خلال الانترنت ، والاعلانات ، واللوحات الاعلانية ، واللي بتعتمد على جذب عملاء جدد والتواصل معاهم وتعرفيهم بالمنتج أو الخدمة المقدمة .
ومن أبرز الشخصيات اللي ساهمت في ظهور التسويق هو ” فيليب كوتلر ” المُلقب بـ أب التسويق الحديث ، وهو مؤلف ومستشار وأستاذ في التسويق الدولي .
له أبحاث في التسويق الاستراتيجي والسلوك الاستهلاكي وتسويق الأعمال والتسويق الالكتروني ، ألف اكتر من ٦٠ كتاب في التسويق ويعتبروا مرجع مهم وأساسي لمجال التسويق ومفهومه وأنواعه ومبادئه ، كتبه هي انطلاقه مهمة و واضحة في عالم التسويق بالنسبة للعالم
.
والتسويق علم كبير بيتطور باستمرار ، ونجاح الشركات والاشخاص معتمد عليه بشكل كلي ، لأن لو في منتج كويس لكن ملوش دعاية وإستراتيجيات تسويقية صح اكيد مش هيحقق النجاح والأرباح المطلوبة .
