خطوات لخطة تسويقية ناجحة !
لازم تعرف ان نجاح أي شركة أو أي مشروع مرتبط ارتباط كبير بـ نجاح نشاط التسويق الخاص به لأن التسويق هو اللي هيعرف عملائك بـ منتجك أو خدمتك ، فـ مهم ان يكون في خطة تسويقية شاملة عشان تقدر تحقق نجاحك ، والنجاح الخطة هيكون من خلال ٧ خطوات :-
الأهداف التسويقية للشركة : لازم يكون قدامك أهداف رئيسية عايز توصلها من خلال مشروعك أو شركتك زي هدف انك تزود عدد الفروع في خلال سنتين ، أو هدف انك تحقق ربح معين مع نهاية السنة .
شخصية المشتري : مهم انك تعرف شخصية عملائك وطباعهم عشان تقدر تحدد احتياجتهم وتوفرها في المنتج أو الخدمة اللي بتقدمها ، وتحدد شريحة العملاء المُستهدفة .
مين هم المنافسين ؟ : دي خطوة مهمة جدًا عشان يكون ليك مكان مميز في السوق ف لازم تعرف مين المنافسين ليك في السوق وتعرف نوع المنتجات أو الخدمات اللي بيقدموها و أسعارهم وعروضهم وطُرق التسويق اللي بيتبعوها .
المنتجات أو الخدمات المُقدمة : لازم تختار المنتج أو الخدمة اللي هتقدمها باهتمام كبير وتتأكد ان عملائك محتاجين ده وتختار الموردين اللي هتشتغل معاهم عشان تتأكد من جودة المواد المستخدمة .
استراتيجة التسعير والترويج : لازم تكون دقيق وانت بتحدد أسعار المنتج أو الخدمة وتوازن بين مكسبك وبين رضى عملائك عن السعر وده مع تحديدك لاستراتيجية الترويج اللي هتتبعها وطُرق و وسائل الترويج اللي هتستخدمها عشان توصل لعملائك بسهولة وذكاء .
تحديد السوق المستهدف : انك تحدد نوع السوق اللي هتشتغل فيه وتقرر وهل هتشتغل بشكل أفقي في منتج واحد أو خدمة واحدة وتطورها زي مثلًا ملابس الأطفال بس ؟ ولا بشكل رأسي وانك تدخل في أكتر من مجال زي انك توفر ملابس للأسرة كلها بأعمارها المختلفة ؟
الميزانية : مهم انك تعرف ميزانيتك اللي بتتكون من رأس المال والاصول اللي عندك وحقوقك زي مثلًا الأثاث الآلات أو البضاعة ، وكمان الخصوم وممتلكات الغير وتكون دايمًا مهتم بالتوازن بينهم عشان متوصله لخسارة .
